’چین سے مقابلہ کے لیے امریکہ کو ہندوستان کا ساتھ ضروری‘، نکی ہیلی کی دونوں ملکوں سے جلد کشیدگی ختم کرنے کی اپیل

اقوام متحدہ میں سابق امریکی سفیر اور ریپبلکن رہنما نکی ہیلی نے کہا ہے کہ ہندوستان کو صدر ڈونالڈ ٹرمپ کی روسی تیل کو لے کر فکرمندی کو سنجیدگی سے لینا چاہیے اور جلد سے جلد وائٹ ہاؤس کے ساتھ مل کر اس مسئلے کا حل نکالنا چاہے۔ انہوں نے کہا کہ دنیا کی دو سب سے بڑی جمہوریت کے درمیان دہائیوں کی دوستی اور گڈوِل موجودہ کشیدگی سے آگے بڑھنے کی مضبوط بنیاد دیتی ہے۔

ہیلی نے سوشل میڈیا سائٹ ’ایکس‘ پر کیے گئے اپنے پوسٹ میں کہا کہ تجارتی اختلاف اور روسی تیل درآمد جیسے معاملوں پر بات چیت ضروری ہے لیکن ہمیں اس بات کو نہیں بھولنا چاہیے کہ سب سے اہم ہمارے مشترکہ مقاصد ہیں۔ چین کا سامنا کرنے کے لیے امریکہ کے پاس ہندوستان کی شکل میں ایک دوست ہونا ہی چاہیے۔

ریپبلکن رہنما نے آگے کہا کہ امریکہ اور ہندوستان کے درمیان حال کے دنوں میں کشیدگی کافی بڑھ گئی ہے۔ ہندوستان کے ذریعہ بڑی مقدار میں روسی تیل خریدنا ولادیمیر پوتن کے یوکرین پر حملے کو اقتصادی مدد دے رہا ہے۔ اس کی وجہ سے ٹرمپ انتظامیہ نے ہندوستان کو 25 فیصد اضافی ٹیرف لگانے کی وارننگ دی ہے۔ یہ قدم ان 25 فیصد ڈیوٹیز کے اوپر ہے جو ہندوستانی اشیا پر پہلے سے لگائے جا چکے ہیں۔ انہوں نے یہ بھی کہا کہ ہندوستان روایتی طور سے دنیا کی سب سے پروٹیکشنسٹ معیشت میں سے رہا ہے۔

حال ہی میں ’نیوز ویک‘ میں لکھے اپنے ایک مضمون میں ہیلی نے زور دے کر کہا کہ ہندوستان کو چین جیسا نہیں سمجھا جانا چاہیے۔ چین نے بھی روس سے تیل خریدا ہے، لیکن اسے اب تک کسی طرح کی پابندی کا سامنا نہیں کرنا پڑا ہے۔ اگر امریکہ اور ہندوستان کے رشتے خراب ہوتے ہیں تو یہ 25 سال کی پیش رفت کو برباد کر دے گا اور چین کو بڑا فائدہ مل جائے گا۔

ہیلی نے کہا کہ ہندوستان امریکہ کے لیے بے حد ضروری ہے تاکہ چین سے سپلائی چَین کو ہٹایا جا سکے۔ کئی ایسی مصنوعات ہیں جنہیں امریکہ میں فوراً بڑے پیمانے پر بنانا ممکن نہیں ہے، جیسے کپڑا، سستے موبائل فون اور سولر پینل، ان کا متبادل صرف ہندوستان ہی دے سکتا ہے۔