'ہندوستان اچھا تجارتی پارٹنر نہیں ہے': ٹرمپ

امریکی صدر ڈونالڈ ٹرمپ نے 5 اگست کو ایک بار پھر ہندوستان پر ٹیرف بڑھانے کی دھمکی دی، انہوں نے کہا کہ ہندوستان  اچھا تجارتی پارٹنر نہیں ہے۔ امریکہ نے اس وقت ہندوستان پر 25 فیصد ٹیرف عائد کر رکھا ہے جو 7 اگست 2025 سے لاگو ہونے جا رہا ہے۔ ٹرمپ نے کہا کہ ہم اگلے 24 گھنٹوں میں ہندوستان  پر ٹیرف بڑھا دیں گے۔

امریکی نیوز چینل سی این بی سی کو انٹرویو دیتے ہوئے ٹرمپ نے فارما انڈسٹریز پر 250 فیصد ٹیرف لگانے کا انتباہ دیا۔ ٹرمپ نے کہا، 'ہم ابتدائی طور پر ادویات پر تھوڑا سا ٹیرف لگائیں گے لیکن ایک یا ڈیڑھ سال کے بعد اسے 150 یا 250 فیصد تک بڑھا دیں گے۔ ہم ایسا کریں گے کیونکہ ہم چاہتے ہیں کہ ادویات ہمارے ملک میں ہی بنیں۔'

ٹرمپ نے یہ اعلان ایک ایسے وقت میں کیا ہے جب امریکہ میں ادویات سازی کی صنعت پر دباؤ بڑھایا جا رہا ہے کہ کمپنیاں امریکہ میں ہی ادویات بنائیں۔ انہوں نے حال ہی میں منشیات کے بڑے سپلائرز سے قیمتوں میں بھاری کمی کا مطالبہ کیا ہے بصورت دیگر سخت کارروائی کا انتباہ دیا ہے۔

وائٹ ہاؤس نے مئی 2025 میں کہا تھا کہ امریکہ میں ادویات کی قیمت دیگر ترقی یافتہ ممالک کے مقابلے تین گنا زیادہ ہے۔ اپریل میں تقریباً تمام تجارتی شراکت داروں پر 10 فیصد ٹیرف عائد کرنے کے بعد، ٹرمپ نے مختلف ممالک کی مصنوعات پر مختلف نرخوں پر ٹیرف عائد کیے ہیں۔

ٹرمپ نے ہندوستان پر روس سے بھاری مقدار میں تیل خریدنے اور پھر منافع کے لیے فروخت کرنے کا الزام لگایا۔ ٹرمپ کی دھمکیوں کے درمیان روس نے ہندوستان کی حمایت کرتے ہوئے کہا کہ خودمختار ممالک کو اپنے مفادات کی بنیاد پر تجارتی اور اقتصادی تعاون میں اپنے شراکت داروں کا انتخاب کرنے کا حق ہے۔

واضح رہےامریکی صدر ٹرمپ نے ایک دن پہلے بھی کہا تھا کہ وہ ہندوستان پر امریکی محصولات میں اضافہ کریں گے۔ انہوں نے ہندوستان پر روسی تیل کی بھاری مقدار خرید کر بھاری منافع پر فروخت کرنے کا الزام بھی لگایا۔ بتایا جا رہا ہے کہ ٹرمپ کے بیان کے چند گھنٹے بعد ہی ہندوستان نے روس سے خام تیل خریدنے پر امریکہ اور یورپی یونین پر جوابی حملہ کیا، جس سے ٹرمپ ناراض ہو گئے اور انہوں نے اب 24 گھنٹے کے اندر ہندوستان پر ٹیرف بڑھانے کی دھمکی دی ہے۔