کابل ائیرپورٹ پر طالبان کا خوف، طیارہ سے لٹکے 3 افراد گر کر ہلاک، دیکھیں ویڈیو

افغانستان پر طالبان کا قبضہ ہوتے ہی کابل کے حامد کرزئی ہوائی اڈبے پر خطرناک حالات پیدا ہو گئے ہیں۔ ملک چھوڑنے کی کوشش میں ہزاروں افغان شہری ائیرپورٹ میں گھس چکے ہیں اور سفارتکاروں کو لے جا رہے امریکی طیاروں میں گھسنے کی کوشش کر رہے ہیں۔ اسی جدوجہد میں امریکی فوج کے طیارہ کے پہیے سے لٹکے تین لوگوں کی اونچائی سے گرنے سے موت ہو گئی۔ ائیرپورٹ پر اب تک 8 سے زیادہ لوگوں کی موت ہو چکی ہے۔

سوشل میڈیا پر کابل ائیرپورٹ کے بدتر مناظر کی کئی ویڈیوز سامنے آ رہی ہیں۔ ڈیلی میل نے بتایا کہ حامد کرزئی بین الاقوامی ہوائی اڈے پر سینکڑوں شہریوں کو افغانستان کے ہوائی ٹرانسپورٹیشن کنٹول پر قبضہ کرنے سے روکنے کے لیے امریکی فوجیوں نے ہوا میں کئی راؤنڈ گولیاں چلائیں، جس سے وہاں بھگدڑ مچ گئی۔ عینی شاہدین نے کہا کہ یہ واضح نہیں ہے کہ مارے گئے لوگ گولیوں سے مارے گئے یا بھگدڑ میں۔

سوشل میڈیا پر پوسٹ ایک دیگر ویڈیو میں کابل ہوائی اڈے سے پرواز بھرنے کے دوران امریکہ کے ایک فوجی طیارہ کے پہیوں سے لٹکے تین بے ٹکٹ مسافروں کی کافی اونچائی سے گرنے کا منظر دکھائی پڑ رہا ہے۔ اس واقعہ میں تینوں لوگوں کی موت واقع ہو گئی۔ کئی ویڈیوز میں سینکڑوں لوگوں کو امریکی طیاروں میں جبراً سوار ہونے اور رَن وے پر امریکی فوج کے سی-17 طیارہ کا پیچھا کرتے ہوئے دیکھا گیا۔ ویڈیو میں سینکڑوں لوگوں کو طیارہ کے ساتھ ساتھ دوڑتے ہوئے دیکھا جا سکتا ہے۔

غور طلب ہے کہ گزشتہ 48 گھنٹے میں افغانستان میں تیزی سے بدلتے حالات میں طالبان کے کابل پر قبضہ کر لینے اور وہیں کی حکومت کے لاپتہ ہو جانے کے بعد کابل ائیر پورٹ سے سبھی کمرشیل سروسز کو معطل کر دیا گیا ہے۔ وہاں سے صرف برطانیہ، امریکہ اور دیگر مغربی ممالک کی فوجی پروازیں اپنے سفارتکاروں اور اپنے شہریوں کو واپس لے کر جا رہی ہیں۔