شہزادہ ہیری اور ان کی بیوی میگن کو شاہی محل سے کیا گیا بے دخل، ملکہ الزبتھ نے شادی میں دیا تھا تحفہ!

برطانیہ کے شہزادہ ہیری اور ان کی بیوی میگن کے لیے بری خبر سامنے آ رہی ہے۔ میڈیا رپورٹس میں دعویٰ کیا جا رہا ہے کہ دونوں کو برطانیہ کے شاہی محل ونڈسر اسٹیٹ سے بے دخل کر دیا گیا ہے۔ گویا کہ پرنس ہیری کے پاس برطانیہ میں اب کوئی بھی ٹھکانہ نہیں رہ گیا ہے۔ فی الحال پرنس ہیری اور ان کی بیگم امریکہ میں مقیم ہیں۔

قابل ذکر بات یہ ہے کہ ونڈسر اسٹیٹ میں واقع فروگمور کاٹیج کو آنجہانی ملکہ الزبتھ دوئم نے پرنس ہیری کو شادی کے موقع پر بطور تحفہ پیش کیا تھا۔ فروگمور کاٹیج کی از سر نو تعمیر پر 2.4 ملین پاؤنڈ کی رقم بھی خرچ کی گئی تھی۔ لیکن برطانوی میڈیا کا کہنا ہے کہ اب یہ محل شہزادہ اینڈریو کو دینے کی پیشکش کی گئی ہے۔ ایسے میں پرنس اینڈریو کو ملنے والے سالانہ گرانٹ میں ڈھائی لاکھ پاؤنڈ کی کٹوتی کی جا سکتی ہے۔

بتایا جاتا ہے کہ ڈیوک اینڈ ڈچیز آف سسیکس پرنس ہیری اور میگن مرکیل کو جنوری ماہ میں ہی اس محل کو خالی کرنے کی ہدایت دے دی گئی تھی۔ ویسے پرنس ہیری اور ان کی بیگم 2020 میں ہی امریکہ کے کیلیفورنیا شہر میں منتقل ہو گئے تھے اور پرنس ہیری اور ان کی بیگم نے شاہی درجہ بھی چھوڑ دیا تھا۔ اس کے بعد پرنس ہیری اور ان کی بیگم نیٹ فلکس کی ایک ڈاکیومنٹری میں دکھائی دیئے تھے۔ اس ڈاکیومنٹری میں شہزادہ ہیری نے راج شاہی کو لے کر کئی انکشافات کیے تھے جس پر بہت ہنگامہ بھی ہوا تھا۔