شمالی کوریا نے بحیرہ جاپان میں دو میزائل داغے

جب پوری دنیا کورونا کے قہر سے پریشان ہے اور دنیا کے کئی شہر دیگر آبادی سے اس وبا کی وجہ سے کٹ کر رہ گئے ہیں اس وقت شمالی کوریا میزائل داغ کر اپنی غیر ذمہ داری کا مظاہرہ کر رہاہے۔شمالی کوریا نے ہفتہ کو شمالی صوبہ پیونگان سے کم فاصلے کے دو بیلسٹک میزائل بحیرہ جاپان میں داغے ۔

جنوبی کوریا کی فوج نے بتایا کہ شمالی کوریا نے شمالی صوبہ پيونگان سے بحیرہ جاپان میں کم فاصلے کے دو بیلسٹک میزائل داغے ہیں ۔ جنوبی کوریا کے جوائنٹ چیف آف اسٹاف نے بتایا کہ وہ صورت حال پر نظر رکھے ہوئے ہیں اور اگر شمالی کوریا اور میزائل فائر کرے تو آگے کی کارروائی کی جائے گی ۔

شمالی کوریا نے اس ماہ کے اواخر میں بھی کئی میزائل داغے تھے ۔ امریکہ اور چین نے پیانگ یانگ کو اپنے نیو کلیائی اور میزائل پروگراموں کو ختم کرنے پر مذاکرات بحال کرنے کو کہا ہے ۔ جاپان کوسٹ گارڈ نے تصدیق کی ہے کہ ایک میزائل اس کے خصوصی اقتصادی خطے کے سمندری حدود کے باہر فائر کیا گیا تھا ۔ شمالی کوریا نے اعلان کیا ہے کہ وہ 10 اپریل کو ملک کی پارلیمنٹ سپریم پیپلز اسمبلی کا ایک اجلاس منعقد کرے گا ۔ تجزیہ کاروں کا کہنا ہے کہ اجلاس میں ملک کے تقریبا 700 رہنما شامل ہوں گے ۔