ٹرمپ کا اعلان، ایلون مسک سے کوئی مفاہمت نہیں ہوگی، کہا کہ سنگین نتائج  بھگتنے ہوں گے

امریکہ میں ان دنوں صدر ڈونالڈ ٹرمپ اور ٹیسلا کے سربراہ ایلون مسک کے درمیان الفاظ  کی جنگ چھڑ گئی ہے۔ پوری دنیا میں اس کا چرچا ہو رہا ہے۔ اگرچہ کل یعنی  7 جون کو ایلون مسک نے نرم رویہ اپناتے ہوئے تعلقات کو بہتر کرنے کی کوشش کی لیکن اب ڈونالڈ ٹرمپ ایسا نہیں چاہتے۔ انہوں نے مسک کو انتہائی سنگین نتائج کا سامنا کرنے کی تنبیہ کی ہے۔

ڈونالڈ ٹرمپ نے ایلون مسک کو خبردار کیا کہ اگر مسک ان کے ٹیکس کٹ بل کے حق میں ووٹ دینے والے ریپبلکنز کے خلاف الیکشن لڑنے کے لیے ڈیموکریٹک امیدواروں کی مالی مدد کرتے ہیں تو اس کے انتہائی سنگین نتائج برآمد ہوں گے۔ امریکی صدر ٹرمپ نے کہا کہ ایلون مسک کے ساتھ ان کے تعلقات اب ختم ہو چکے ہیں۔

ٹرمپ نے این بی سی نیوز کو دیے گئے ایک فون انٹرویو میں کہا، ’’اگر وہ ایسا کرتے ہیں تو انھیں نتائج کا سامنا کرنا پڑے گا‘‘۔ تاہم انہوں نے یہ نہیں بتایا کہ اس کے کیا نتائج ہو سکتے ہیں۔ انہوں نے صرف اتنا کہا کہ ’’اگر انہوں نے ایسا کیا تو انہیں بہت سنگین نتائج کا سامنا کرنا پڑے گا‘‘۔ اس کے ساتھ جب ان سے پوچھا گیا کہ کیا وہ ایلون مسک کے ساتھ اپنے تعلقات کو بہتر بنانا چاہتے ہیں تو انہوں نے کہا کہ’ نہیں ۔‘ جب ان سے پوچھا گیا کہ کیا وہ محسوس کرتے ہیں کہ ٹیسلا اور اسپیس ایکس کے سی ای او کے ساتھ ان کا رشتہ ختم ہو گیا ہے، ٹرمپ نے کہا، "ہاں، میں ایسا ہی مانتا ہوں۔"

ٹرمپ نے کہا کہ ان کا مسک سے جلد بات کرنے کا کوئی ارادہ نہیں ہے۔ اس نے کہا کہ میں دوسرے کاموں میں بہت مصروف ہوں۔ ان کا مزید کہنا تھا کہ میرا ان سے بات کرنے کا کوئی ارادہ نہیں ہے۔ ٹرمپ نے مسک پر صدر کے عہدے کی بے عزتی کا الزام بھی لگایا۔ انہوں نے کہا، "میرے خیال میں یہ بہت بری بات ہے۔ آپ صدر کے عہدے کی بے عزتی نہیں کر سکتے۔" ایپسٹین فائلوں کے حوالے سے مسک کی دھمکی پر، ٹرمپ نے ہفتے کے روز کہا، "اسے پرانی خبر کہتے ہیں، یہ پرانی خبر ہے، برسوں سے اس کے بارے میں بات کی جاتی رہی ہے۔ یہاں تک کہ ایپسٹین کے وکیل نے کہا کہ میرا اس سے کوئی تعلق نہیں ہے۔ یہ پرانی خبر ہے۔"

درحقیقت، مسک نے 5 جون کو ایکس پر صدر ٹرمپ کے خلاف کئی پوسٹس کیں، جس میں صدر اور مرحوم جنسی مجرم جیفری ایپسٹین کے درمیان پرانے تعلقات کے بارے میں بات کی گئی۔ تاہم مسک نے اب ان پوسٹس کو ڈیلیٹ کر دیا ہے۔