جاپان کے وزیر اعظم شنجو آبے نے دیا استعفیٰ

جاپان کے وزیر اعظم شنجو آبے نے اپنے عہدہ سے استعفیٰ دے دیا ہے۔ جاپان کی میڈیا رپورٹ کے مطابق آبے خراب صحت کی وجہ سے کافی پریشان تھے اور اسی لیے انھوں نے یہ سخت قدم اٹھایا۔ بتایا جا رہا ہے کہ گزشتہ دو دنوں میں آبے دو مرتبہ ٹوکیو کے اسپتال میں جا چکے ہیں۔ خبروں کے مطابق آبے اپنی سالوں پرانی بیماری السریٹیو کولائٹس سے پریشان ہیں۔ امکان ظاہر کیا جا رہا ہے کہ شنجو آبے استعفیٰ دینے اور اپنی بیماری کے بارے میں بتانے کے لیے پریس کانفرنس کر سکتے ہیں۔

اس درمیان جاپان کی برسراقتدار پارٹی کے مطابق شنجو آبے کی صحت ٹھیک ہے، لیکن اسپتال کے طویل دورے کو لے کر قیاس آرائیاں ہو رہی ہیں کہ کیا وہ ستمبر 2021 میں اپنی مدت کار کے آخر تک عہدہ پر بنے رہ پائیں گے۔

قابل ذکر ہے کہ یہ دوسری مرتبہ ہے جب خراب صحت کی وجہ سے آبے کو اپنا عہدہ چھوڑنا پڑا۔ اس سے قبل انھوں نے 2007 میں ایک سال تک دفتر میں رہنے کے بعد اپنا عہدہ چھوڑا تھا۔ وہ دوبارہ 2012 میں زبردست اکثریت کے ساتھ اقتدار میں واپس لوٹے تھے۔