اسرائیل سے سینکڑوں فلسطینیوں کی ہونے والی ہے رِہائی، حماس بھی 4 اسرائیلیوں کی لاشیں کرے گا سپرد

اسرائیل اور حماس کے درمیان جنگ بندی کا پہلا مرحلہ چند روز میں ختم ہونے والا ہے۔ دوسرے مرحلہ کے لیے بات چیت ہونی ہے، لیکن حماس اور اسرائیل دونوں ہی کچھ معاملوں پر اپنی ناراضگی ظاہر کر رہے ہیں۔ فی الحال امید کی جا رہی ہے کہ جلد ہی اسرائیل سینکڑوں فلسطینی قیدیوں کو رِہا کرے گا، اور پھر اس کے بدلے میں حماس جمعرات (27 فروری) کو 4 اسرائیلی یرغمالوں کی لاشیں لوٹائے گا۔

قابل ذکر ہے کہ اسرائیل نے حماس کی طرف سے یرغمالوں کی رِہائی کے دوران ان کے ساتھ کیے گئے غلط سلوک کے احتجاج میں ہفتہ کے روز سے تقریباً 600 فلسطینی قیدیوں کی رِہائی میں تاخیر کی تھی۔ اس پر حماس نے کہا ہے کہ یہ تاخیر ان کی جنگ بندی سے متعلق اصولوں کی خلاف ورزی ہے، اور جب تک فلسطینیوں کو رِہا نہیں کیا جاتا، تب تک دوسرے مرحلہ پر بات چیت ممکن نہیں ہے۔

حماس کے ترجمان عبداللطیف الکانو نے بدھ کے روز بتایا کہ حماس اگلے دن 4 اسرائیلیوں کی لاشیں سونپ دے گا۔ اس کے بدلے میں اسرائیل فلسطینیوں کو رِہا کرے گا۔ ساتھ ہی 7 اکتوبر 2023 کو اسرائیل پر حماس کے حملے کے بعد سے حراست میں لی گئی کثیر تعداد میں خواتین و نابالغوں کو بھی رِہا کیا جائے گا۔ ایک اسرائیلی افسر نے اس بات کی تصدیق کی ہے کہ 4 یرغمالیوں کی لاشیں سونپے جانے کی امید ہے، لیکن انھوں نے مزید کوئی تفصیل نہیں دی۔

اسرائیل اور حماس نے منگل کے روز ہی مطلع کیا تھا کہ یرغمالوں کی لاشیں لوٹانے کے لیے ایک معاہدہ ہو گیا ہے، لیکن کوئی تاریخ مقرر نہیں کی گئی تھی۔ حماس نے قبل میں یرغمالوں اور 4 مردہ یرغمالوں کی لاشوں کو بڑی عوامی تقریب میں حوالے کیا، جس کے دوران اسرائیلیوں کو پریڈ کروائی گئی اور بڑی بھیڑ کے سامنے ہاتھ ہلانے کے لیے مجبور کیا گیا۔ اسے اسرائیل، ریڈ کراس اور اقوام متحدہ نے ہتک آمیز قرار دیا تھا۔

واضح رہے کہ نیا معاہدہ جنگ بندی کے پہلے مرحلے میں دونوں فریقین کی ذمہ داریوں کو پورا کیے جانے کے بعد ہوگا۔ پہلے مرحلہ میں حماس تقریباً 2000 فلسطینی قیدیوں کے بدلے میں 8 لاشوں سمیت 33 یرغمالوں کو لوٹا رہا ہے۔ امریکہ، مصر اور قطر کی طرف سے ثالثی کے بعد جنگ بندی نے 15 مہینوں کی شدید لڑائی کو ختم کر دیا، جو کہ حماس کے ذریعہ 7 اکتوبر 2023 کو کیے گئے حملے کے بعد شروع ہوئی تھی۔ اس حملے میں اسرائیل میں تقریباً 1200 افراد ہلاک ہوئے تھے اور تقریباً 250 لوگوں کو یرغمال بنا لیا گیا تھا۔