نیپال میں جین- زی مظاہرین کا سابق وزیر اعظم اولی کی گرفتاری کا مطالبہ
سوشل میڈیا پر پابندی کے خلاف نیپال میں جین- زی کا احتجاج کم ہوتا دکھائی دے رہا ہے۔ جین- زی گروپ نے اب سابق وزیر اعظم کے پی شرما اولی اور اس وقت کے وزیر داخلہ رمیش لیکھک کی گرفتاری کا مطالبہ کیا ہے۔
20 ستمبر کو، نیپال میں جین- زی گروپ نے حکومت مخالف مظاہروں کے دوران 8 ستمبر کو ہونے والی فائرنگ میں ان کے مبینہ کردار کے لیے سابق وزیر اعظم کے پی شرما اولی اور اس وقت کے وزیر داخلہ رمیش لیکھک کی گرفتاری کا مطالبہ کیا، جس میں 19 افراد ہلاک ہوئے تھے۔
احتجاج کی قیادت کرنے والے جین- زی گروپ کے مشیروں میں سے ایک ڈاکٹر نکولس بشیل نے ایک پریس کانفرنس میں کہا کہ اولی، لیکھک اور کھٹمنڈو کے چیف ڈسٹرکٹ آفیسر، چھبی رجال کو فوری طور پر گرفتار کیا جانا چاہیے کیونکہ وہ نئے بنیشور میں فائرنگ کے براہ راست ذمہ دار تھے، جس میں 19 کارکن مارے گئے تھے۔
بشیل نے 1990 سے لے کر اب تک تمام اعلیٰ سطحی سیاست دانوں اور سرکاری افسران کے اثاثوں کی چھان بین کے لیے ایک اعلیٰ سطحی انکوائری کمیشن کی تشکیل کا بھی مطالبہ کیا۔ مزید برآں، جین- زی کے کارکنوں نے یہاں سنگھا دربار سیکرٹریٹ کے قریب میتگھر منڈلا میں دھرنا دیا، اولی اور لیکھک کی گرفتاری کا مطالبہ کیا۔ یہیں سے انہوں نے 8 ستمبر کو اپنی احتجاجی ریلی نکالی تھی۔
مبینہ بدعنوانی اور سوشل میڈیا ویب سائٹس پر پابندی کے خلاف 8 اور 9 ستمبر کو پرتشدد مظاہروں کے دوران تین پولیس اہلکاروں سمیت کم از کم 72 افراد ہلاک ہو گئے تھے۔ 19 ستمبر کو، سابق وزیر اعظم اولی نے اس بات کی تردید کی کہ انہوں نے جین- زی کے مظاہرے کے دوران فائرنگ کا حکم دیا تھا۔
انہوں نے کہا کہ مظاہرین پر خودکار بندوقوں سے فائرنگ کی گئی، جو پولیس کے پاس نہیں تھی۔ اولی نے معاملے کی تحقیقات کا مطالبہ کیا۔ وزیر اعظم کے عہدے سے مستعفی ہونے کے بعد اپنے پہلے عوامی بیان میں، نیپال کمیونسٹ پارٹی (یونیفائیڈ مارکسسٹ-لیننسٹ) کے چیئرمین اولی نے جین- زی گروپ کے "پرامن احتجاج" کے دوران تشدد کے لیے دراندازوں کو ذمہ دار ٹھہرایا۔
اولی نے یوم دستور کے موقع پر جاری کردہ ایک پیغام میں کہا، "حکومت نے مظاہرین پر گولی چلانے کا حکم نہیں دیا تھا۔" دریں اثنا، سپریم کورٹ کے چیف جسٹس پرکاش مان سنگھ راوت نے ہفتہ کو کہا کہ عدالت نے سوشل میڈیا ویب سائٹس پر پابندی لگانے کا کوئی حکم جاری نہیں کیا ہے۔
انہوں نے کہا کہ سپریم کورٹ نے حکومت پر زور دیا ہے کہ وہ ضروری قوانین بنا کر سوشل میڈیا ویب سائٹس کو ریگولیٹ کرے، جو کہ ایک عام بین الاقوامی عمل ہے۔ اولی کی قیادت والی پچھلی حکومت نے سپریم کورٹ کے حکم کا حوالہ دیتے ہوئے 26 سوشل میڈیا سائٹس پر پابندی لگا دی تھی، جس کی 8 ستمبر کو جین- زی گروپ نے مخالفت کی تھی۔