کورونا بحران: سخت آزمائش میں امریکہ، گزشتہ ہفتہ بے روزگاری بھتہ کے لیے 14 لاکھ عرضیاں داخل

واشنگٹن: کورونا بحران میں روزگار کے محاذ پر دنیا کے تقریباً سبھی ممالک بری طرح متاثر ہوئے ہیں۔ سب سے زیادہ برا حال امریکہ کا ہے جہاں گزشتہ ہفتے روزگار سے محروم ہونے والے مزید 14 لاکھ لوگوں نے بے روزگاری بھتے کے لیے درخواستیں جمع کرائیں۔ یہ اطلاع جمعرات کو امریکہ کے محکمہ محنت کشاں نے ایک بیان میں دی ہے۔

کورونا وائرس کے نتیجے میں بڑے پیمانے پر کاروبار بند ہونے سے امریکہ میں بڑی تعداد میں بے روزگاری پھیلی ہے۔ حکام کا کہنا ہے کہ بہرحال مرحلہ وار پابندیوں میں ڈھیل دینے سے لاکھوں لوگ روزگار پر واپس آ گئے ہیں۔ باوجودیکہ کئی امریکی ریاستوں میں حالیہ ہفتوں میں کووڈ 19 کا زور سامنے آیا ہے اور مریضوں میں یومیہ اضافی کی اوسط 60 ہزار سے زیادہ رہی۔ متاثرین کی مجموعی تعداد 40 لاکھ ہو چکی ہے۔ روزگار پر اس صورتحال کا بہت خراب اثر پڑ رہا ہے۔

امریکہ کے کووڈ-19 کی زد میں آنے کے بعد کے بعد کسی ایک ہفتے میں سب سے زیادہ بے روزگاری بھتے کے لیے درخواستیں مارچ میں داخل کی گئی تھیں جن کی تعداد 69 لاکھ کے قریب تھی، جب کہ گزشتہ چار ہفتوں کے دوران اوسطاً 14 لاکھ درخواستیں دائر کی جاتی رہی ہیں جو تاریخی اعتبار سے بہت اونچی شرح ہے۔ حکومت کا کہنا ہے کہ اگرچہ لاکھوں لوگ اپنے روزگار پر واپس چلے گئے ہیں، لیکن اس کے باوجود ملک میں بے روزگارلوگوں کی تعداد ایک کروڑ 62 لاکھ کے قریب ہے۔

گزشتہ چار مہینوں کے دوران ایسا بھی ہوا ہے کہ کسی ایک وقت میں 5 کروڑ 24 لاکھ لوگوں نے حکومت سے بے روزگاری بھتے حاصل کئے ہیں۔ وائس آف امریکہ کے مطابق کرونا وائرس کی وبا کے دوران حکومت نے بے روزگار ہونے والے کارکنوں کی مدد کے لیے الاونس کے علاوہ انہیں 600 ڈالر فی ہفتہ دینے کا بھی اعلان کیا تھا۔ اس عبوری امداد کی مدت اس ہفتے ختم ہو رہی ہے۔ وائٹ ہاؤس اور کانگرس بے روزگاروں کے لیے اضافی امداد پر غور کر رہی ہے۔ تاہم، ابھی اس بارے میں کوئی حتمی فیصلہ نہیں ہوا۔