لیبیا کی مسجد میں دھماکے، 2 افراد ہلاک، 55 زخمی

بن غازی: لیبیا کے مشرقی بن غازی شہر میں ایک مسجد کے اندر دوہرے بم دھماکے میں دو افراد کی موت ہو گئی جبکہ 55 دیگرافراد زخمی ہو گئے ہیں۔

مقامی باشندوں نے بتایا کہ دھماکے ضلع مجوری کی ایک مسجد میں جمعہ کی نماز کے دوران ہوئے۔ فوج کے ایک ذریعہ نے بتایا کہ بموں کو شاید موبائل فون کے ذریعے دھماکہ کیا گیا۔

طبی ذرائع کے مطابق درجنوں زخمی افراد میں سے متعدد کی حالت تشویشناک ہے اور ہلاکتوں کی تعداد زیادہ ہو نے کا خدشہ ہے۔

اسی شہر میں دو ہفتے قبل بھی دو ایسے بڑے کار بم دھماکے ہوئے تھے، جن میں 35 افراد ہلاک ہو گئے تھے اور درجنوں زخمی ہوئے تھے۔ یہ دھماکے بھی بن غازی کے وسطی علاقے میں ایک مسجد کے سامنے کیے گئے تھے۔

بن غازی لیبیا کا دوسرا سب سے بڑا شہر ہےاور وہاں فوجی کمانڈر خلیفہ حفتر کی قیادت میں لیبیائی نیشنل آرمی یا ایل این اے کو کنٹرول حاصل ہے ۔ وہاں داعش اور القاعدہ سے منسلک کئی فعال شدت پسند گروہ ابھی تک موجود ہیں، جن کے خلاف نیشنل آرمی کے دستے کی کارروائیاں جاری ہیں۔

ماہرین کے مطابق بن غازی میں یہ بم حملے زیادہ تر انہی شدت پسند گروہوں کی طرف سے ہوتے ہیں۔