افغانستان: باریکوٹ کیمپ پر پاکستانی حملہ میں 200 طالبانی جنگجو کی ہلاکت کا دعویٰ، 23 پاکستانی فوجی بھی ہلاک

پاکستان اور افغانستان کے درمیان تلخی بڑھتی جا رہی ہے۔ گزشتہ دنوں پاکستان نے افغانستان کی سرحد کے پاس طالبان کے کئی ٹھکانوں اور چوکیوں کو نشانہ بنایا تھا۔ ان میں باریکوٹ بیس کیمپ بھی شامل ہے۔ اب کچھ ایسی تصویریں سامنے آئی ہیں، جن میں دیکھا جا سکتا ہے کہ طالبان کے باریکوٹ کیمپ کو پاکستان کے حملے میں شدید نقصان پہنچا ہے۔

پاکستان نے حملہ سے متعلق بتایا ہے کہ یہ کارروائی طالبان اور ان سے منسلک دہشت گردوں کی شورش پسندانہ کارروائیوں کو دبانے کے لیے کی گئی۔ پاکستانی فوج کا دعویٰ ہے کہ اس حملہ میں طالبان کے تقریباً 200 جنگجو اور دہشت گرد تنظیموں سے منسلک افراد مارے گئے ہیں۔ ساتھ ہی پاکستان نے اس بات کا اعتراف کیا ہے کہ اس تصادم میں 23 پاکستانی فوجی ہلاک اور کچھ زخمی بھی ہوئے ہیں۔

پاکستانی میڈیا میں دعویٰ کیا گیا ہے کہ کئی طالبان کمانڈ پوسٹ، کیمپس، ٹینکس اور سپورٹ نیٹورک تباہ ہو گئے ہیں۔ ان میں باریکوٹ کیمپ، منوئبا کیمپ-3، کرزئی پوسٹ، شپولا خلا پوسٹ شامل ہیں۔ سامنے آئی تصویروں اور ویڈیوز میں دیکھا جا سکتا ہے کہ طالبان پوسٹس جل رہے ہیں، کچھ چوکیاں پوری طرح تباہ ہو گئی ہیں۔ اس حملہ اور تصادم کے بعد سرحد پار اہم کاروباری راستوں اور چوراہوں پر کشیدگی بڑھ گئی ہے۔ سرحد پر کراسنگ بند ہو جانے کی خبریں بھی سامنے آ رہی ہیں۔

پاکستان کا کہنا ہے کہ یہ حملہ ’سیلف ڈیفنس‘ میں کیا گیا تھا۔ اس کا کہنا ہے کہ افغانستان واقع طالبانی کیمپوں سے پاکستان پر حملہ کی باتیں سامنے آئی تھیں۔ حالانکہ افغان طالبان نے ان دعووں کو خارج کیا ہے۔ طالبان کا کہنا ہے کہ پاکستان نے ان کے علاقے میں ہوائی حملے کیے، جن کا وہ جواب دے رہے ہیں۔