میانمار: 7.7 شدت کے تباہناک زلزلہ کے بعد اب تک 66 جھٹکے ہوئے محسوس، 3085 ہلاکتوں کی تصدیق، تقریباً 5000 زخمی

میانمار میں گزشتہ جمعہ کو آئے 7.7 شدت کے تباہناک زلزلہ کے بعد بھی کئی جھٹکے (آفٹر شاکس) مقامی لوگوں نے محسوس کیے ہیں۔ جھٹکوں کا یہ سلسلہ ہنوز جاری ہے۔ ملک کے موسمیاتی سائنس و آبی سائنس محکمہ کے مطابق جمعرات کی صبح تک 2.8 سے 7.5 شدت کے 66 جھٹکے محسوس کیے گئے ہیں۔ ریاستی انتظامیہ کونسل انفارمیشن ٹیم کے مطابق زلزلہ میں ہلاکتوں کی تعداد بھی بڑھ کر 3085 ہو گئی ہے۔ 4715 افراد اس دوران زخمی ہوئے ہیں اور 341 اب بھی لاپتہ ہیں۔

اس درمیان ریاستی انتظامیہ کونسل (ایس اے سی) کے سربراہ من آنگ ہوائنگ نے کہا کہ میانمار حکومت زلزلہ راحت و بازآبادکاری کوششوں کے لیے 500 ارب کیات (تقریباً 238.09 ملین ڈالر) امداد کرے گی۔ سرکاری روزنامہ ’دی گلوبل نیو لائٹ آف میانمار‘ کی رپورٹ کے مطابق میانمار کے لیڈر نے یہ بیان منگل کے روز نے پی تاؤ میں ایک نقد عطیہ تقریب میں دیا۔ پروگرام میں خیر خواہوں نے 104.44 بلین کیات (49.7 ملین ڈالر) نقد اور 12.4 بلین کیات (5.9 ملین ڈالر) قدر کی غیر نقدی چیزیں عطیہ کیں۔

گزشتہ جمعہ کو میانمار میں آئے خوفناک زلزلہ کے بعد فوجی حاکم من آنگ ہوائنگ نے بین الاقوامی مدد کی بھی اپیل کی ہے۔ 31 مارچ تک 16 ممالک، علاقوں سے بچاؤ ٹیم، ڈاکٹرس اور نرسز، انسانی امداد، میڈیکل سپلائی کے ساتھ میانمار پہنچ چکی ہیں۔ اس درمیان مقامی روزنامہ ’میانماں ایلن‘ کے مطابق میانمار میں اب تک آئے 18 طاقتور زلزلوں میں سے 7.7 شدت کا زلزلہ دوسرا سب سے طاقتور زلزلہ تھا۔ اس سے قبل 1912 میں ملک میں 8.0 شدت کا زلزلہ آیا تھا۔