کیا آئی ایم ایف پاکستان کو بیل آؤٹ پیکج دے گا؟

پاکستانی وزیر خارجہ اسد عمر کی جانب سے ملکی مالی بحران کے خاتمے کا اعلان ایک ایسے موقع پر سامنے آیا ہے، جب آئی ایم ایف اور پاکستان کے مابین بیل آؤٹ پیکج کے موضوع پر بات چیت ہو رہی ہے۔ خبر رساں ادارے روئٹرز کے مطابق گو اس اعلان سے اعتماد میں اضافہ ہوا ہے تاہم پاکستان کو مالی بحران سے نکلنے کے لیے بیل آؤٹ پیکج کی ضرورت ہے۔

دارالحکومت اسلام آباد سے وزارت خزانہ کے ترجمان نور احمد نے بتايا کہ آئی ايم ایف کی ايک ٹيم پاکستانی اقتصاديات کو درپيش صورتحال و خطرات کا تفصيلی جائزہ لينے کے بعد اس بات کا فيصلہ کرے گی کہ اس مالياتی بحران سے کس طرح نمٹا جائے۔ پاکستان کے لیے اس تيرہويں ممکنہ ’بيل آؤٹ پيکج‘ کے لیے يہ مذاکرات بيس نومبر کو اختتام پذير ہوں گے۔ رواں مالياتی سال کے لے پاکستان کو بارہ بلين ڈالرز درکار ہيں۔

پاکستانی وزیر خزانہ اسد عمر نے کہا تھا کہ پاکستان ادائیگیوں کے عدم توازن کا بحران فی الحال ختم ہو گیا ہے۔ اسد عمر نے سعودی عرب اور چین کی جانب سے اربوں ڈالر کی امداد کے وعدوں کے بعد یہ بیان دیا ہے۔

دوسری جانب اسٹیٹ بینک آف پاکستان کے گورنر طارق باجوہ جمعہ نو نومبر کو چین کا دورہ کر رہے ہیں اور اس دوران فوری رقم مہیا کرنے کے چینی وعدے کو عملی جامہ پہنانے کے طریقہ کار پر بات چیت ہو گی۔

ماہرین کے مطابق سعودی عرب اور چینی یقین دہانیوں کے بعد پاکستان کی مشکلات میں گھری معیشت کو کچھ سہارا ملے گا اور روپے کی قیمت مستحکم ہو گی۔ گزشتہ برس دسبمر سے اب تک ڈالر کے مقابلے میں پاکستانی روپیہ پچیس فیصد تک اپنی قدر کھو چکا ہے۔