ایران-اسرائیل جنگ سے حالات انتہائی کشیدہ، ایک لاکھ ٹن باسمتی چاول ایران بھیجا گیا، لیکن پہنچ نہیں پایا!

ایران اور اسرائیل کے درمیان جنگ دن بہ دن شدت اختیار کرتی جا رہی ہے۔ امریکہ کے ذریعہ ایران پر کیے گئے حملے نے حالات کو مزید کشیدہ بنا دیا ہے۔ اس درمیان ایران کے لیے مزید ایک مشکل سامنے آ گئی ہے۔ ایران بھیجا گیا تقریباً ایک لاکھ ٹن باسمتی چاول راستے میں ہی پھنس گیا ہے۔ باسمتی چاول ایران میں بہت استعمال ہوتا ہے اور سعودی عرب کے بعد ایران ہی اس کا سب سے بڑا درآمد کنندہ ہے۔

آل انڈیا رائس ایکسپورٹر ایسو سی ایشن نے پیر کے روز جانکاری دیتے ہوئے بتایا کہ ایران-اسرائیل جنگ کے سبب ایران کو بھیجا جانے والا تقریباً 1 لاکھ ٹن باسمتی چاول ہندوستانی بندرگاہوں پر پھنسا ہوا ہے۔ ایسو سی ایشن کے سربراہ ستیش گویل نے کہا کہ ایران کو بھیجا جانے والا تقریباً ایک لاکھ ٹن باسمتی چاول بندرگاہوں پر پھنس گیا ہے، جس میں ہندوستان کے مجموعی باسمتی چاول ایکسپورٹ کا 20-18 فیصد حصہ ایران کا ہے۔ گویل نے بتایا کہ شپمنٹ خصوصی طور سے گجرات کے کانڈلا اور مندرا بندرگاہوں پر رکے ہوئے ہیں، کیونکہ مشرق وسطیٰ میں جنگ کے سبب ایران جانے والے کارگو کے لیے نہ تو جہاز دستیاب ہیں، اور نہ ہی انشور دستیاب ہے۔

گویل کا کہنا ہے کہ بین الاقوامی سطح پر کشیدگی عام طور پر اسٹینڈرڈ شپنگ انشورنس پالیسیوں کے تحت کور نہیں ہوتے ہیں، جس سے ایکسپورٹر اپنی کھیپ بھیجنے میں ناکام ہو جاتے ہیں۔ انھوں نے کہا کہ گھریلو بازار میں باسمتی چاول کی قیمتیں پہلے ہی 5-4 روپے فی کلوگرام تک گر چکی ہیں۔ ایسو سی ایشن اس ایشو پر اے پی ڈی کے رابطہ میں ہے۔ انھوں نے یہ بھی بتایا کہ بحران پر گفتگو کے لیے 30 جون کو مرکزی وزیر برائے کامرس و صنعت پیوش گویل کے ساتھ میٹنگ بھی ہونی ہے۔

واضح رہے کہ سعودی عرب کے بعد ایران ہندوستان کا دوسرا سب سے بڑا باسمتی چاول بازار ہے۔ ہندوستان نے مارچ میں ختم ہوئے مالی سال 25-2024 کے دوران ایران کو تقریباً ایک ملین ٹن خوشبودار اناج برآمد کیا۔ ہندوستان نے 25-2024 کے دوران تقریباً 6 ملین ٹن باسمتی چاول ایکسپورٹ کیا، جس کی طلب خاص طور سے مشرق وسطیٰ اور مغربی ایشیائی بازاروں سے متاثر تھی۔ دیگر اہم خریداروں میں عراق، یو اے ای اور امریکہ شامل ہیں۔ حال کے ہفتوں میں ایران-اسرائیل جنگ کافی شدت اختیار کر گئی ہے، دونوں فریقین نے بڑے حملے کیے ہیں اور امریکہ بھی سیدھے طور پر اس جنگ میں شامل ہو گیا ہے۔ اس قدم نے حالات کو مزید تشویش ناک بنا دیا ہے۔