ہندوستان اور انڈونیشیا کے درمیان ’برہموس میزائل معاہدہ‘ پر جلد لگے گی آخری مہر!

ہندوستان اور انڈونیشیا کے درمیان 450 ملین ڈالر کی برہموس سپرسونک کروز میزائل ڈیل فائنل ہونے کے بہت قریب ہے۔ 26 جنوری (اتوار) کو انڈونیشیا کے ایک اعلیٰ سطحی دفاعی وفد نے ہندوستان کے برہموس میزائل سسٹم کی صلاحیتو پر پریزنٹیشن دیکھا۔ یہ مجوزہ معاہدہ انڈونیشیا کو برہموس میزائل خریدنے والا دوسرا آسیان ملک بنائے گا۔ اس سے قبل فلپائن نے برہموس میزائل سسٹم خریدا تھا۔

میڈیا رپورٹس کے مطابق انڈونیشیائی بحریہ چیف محمد علی کی قیادت میں ایک نمائندہ وفد ہندوستان کے برہموس ایئرواسپیس ہیڈکوارٹر پہنچا جہاں انھوں نے برہموس کے سی ای او جیہ تیرتھ آر جوشی اور دیگر سینئر افسران سے ملاقات کی۔ برہموس ایئرواسپیس کے ذرائع سے ملی خبروں کے مطابق انڈونیشیائی وفد کو برہموس میزائل سسٹم کی طاقت اور صلاحیتوں کے بارے میں تفصیلی جانکاری دی گئی۔ اس درمیان دونوں فریقین نے ڈیفنس اور اسٹریٹجی کے شعبہ میں تعاون کو مزید مضبوط کرنے کے لیے اپنے نظریات بھی سامنے رکھے۔

واضح رہے کہ برہموس میزائل کی رینج 290 کلومیٹر ہے اور یہ ہندوستان کی مسلح افواج کی ریڑھ بن چکی ہے۔ یہ معاہدہ ہندوستانی وزیر اعظم نریندر مودی اور انڈونیشیائی صدر پرابووو سبیانتو کے درمیان ہوئی میٹنگ کا اہم موضوع رہا ہے۔ پرابووو سبیانتو نے ہندوستان کی یوم جمہوریہ تقریب میں بطور مہمانِ خصوصی شرکت کی تھی۔