کورونا بحران: والدین یو اے ای میں اور 10 سالہ بچی ہندوستان میں، ملاقات کے لیے بے چین

متحدہ عرب امارات یعنی یو اے ای میں مقیم ایک فیملی کی 12 سال سے کم عمر کی بچی ہندوستان میں پھنسی ہوئی ہے کیونکہ ائیر لائن کمپنیوں نے نابالغ بچوں کو پرواز بھرنے کی اجازت نہیں دی ہے۔ ایک میڈیا رپورٹ کے مطابق والدین نے اس معاملے میں حکومت سے استثنائی شکل میں چھوٹ دینے کا مطالبہ کیا ہے۔ ہندوستان 31 جولائی تک ہوائی سفر کی پابندیوں کو آگے بڑھانے جا رہا ہے اور دو فریقی سمجھوتے کے تحت ہندوستان اور یو اے ای کے درمیان صرف خصوصی پروازوں کی اجازت ہے۔

یو اے ای نے 12 جولائی سے لوتنے کے خواہش مند ان ہندوستانیوں کو واپس سفر کرنے کے لیے 15 دن کا وقت دیا ہے جن کے پاس اہل رہائشی پرمٹ ہے۔ ساتھ ہی ان کے پاس کووڈ-19 ٹیسٹ کی نگیٹو رپورٹ ہونا ضروری ہے۔ خلیج ٹائمز نے بتایا کہ نابالغ کے والدین کے پاس واپسی کا پرمٹ ہونے کے بعد بھی وہ سفر نہیں کر پا رہے ہیں۔

دوبئی میں رہنے والی خاتون پونم سَپرے نے خلیج ٹائمز کو بتایا کہ "میری بیٹی تین مہینے سے ہندوستان میں پھنسی ہے۔ ہمارے پاس اس کے لیے جی ڈی آر ایف اے کی بھی منظوری ہے، لیکن اس کی عمر 12 سال سے کم ہونے کے سبب ائیر لائن کمپنیاں اس کی بکنگ قبول نہیں کر رہی ہیں۔" انھوں نے یہ بھی بتایا کہ ان کی بیٹی ایوان سَپرے کی عمر 10 سال ہے اور وہ حیدر آباد میں ہے۔

اسی طرح دوبئی کی ایک اور فیملی، جو اپنا نام نہیں بتانا چاہتے، ان کا 8 سالہ بیٹا بھی کیرالہ میں پھنسا ہوا ہے۔ وہ بھی ائیرلائنس کی پالیسیوں کے سبب پرواز بھرنے میں ناکام ہے۔ اسی درمیان ممبئی کی ایک خاتون نے دوبئی میں پھنسی اپنی 10 سال کی جڑواں بیٹیوں کو واپس لانے کے لیے پیر کے روز پرواز بھری تھی۔