اہم خبریں: رابڑی دیوی کی دعوتِ افطار میں وزیر اعلیٰ نتیش کی شرکت

بہار کی سابق وزیر اعلیٰ اور آر جے ڈی کی لیڈر رابڑی دیوی نے آج اپنی رہائش گاہ پر دعوت افطار کا اہتمام کیا ہے۔ افطار میں وزیر اعلیٰ نتیش کمار نے شرکت کی ہے۔ اس دوران نتیش کمار، تیج پرتاپ سنگھ اور تجسوی یادو ایک ہی سوفہ پر بیٹھے ہوئے نظر آ رہے ہیں۔

کرناٹک یوتھ کانگریس کے کارکنان نے آج بنگلورو میں ایندھن کی بڑھتی قیمتوں اور مہنگائی کے خلاف احتجاج کیا۔ اس دوران مظاہرین نے حکومت مخالف نعرے بازی کی اور قیمتوں کو کم کرنے کا مطالبہ کیا۔

دہلی حکومت نے اسکولوں میں کورونا وائرس کے بڑھتے معاملوں کو روکنے کے لیے نئی گائیڈلائنس جاری کر دی گئی ہیں۔ گائیڈلائنس کے مطابق اسکولوں میں کوارنٹائن روم دستیاب ہوگا۔ اساتذہ روزانہ طلبا اور طلبا کے اہل خانہ سے کووڈ سے متعلق علامتوں کے بارے میں دریافت کریں گے۔

دہلی کی تاریخی جامع مسجد میں عیدالفطر کی نماز صبح 6 بجے ہوگی۔ اس سلسلے میں 22 اپریل کو نمازِ جمعہ سے قبل اعلان کیا گیا۔ عیدالفطر کی نماز سخت سیکورٹی کے درمیان ادا کی جائے گی۔ قابل ذکر ہے کہ رمضان المبارک میں بھی جامع مسجد کے آس پاس سیکورٹی کے انتظامات کیے گئے ہیں۔

دہلی پولیس کمشنر نے ای ڈی (انفورسمنٹ ڈائریکٹوریٹ) کو ایک خط لکھا ہے جس میں کہا گیا ہے کہ جہانگیر پوری تشدد کے اہم ملزم انصار کے خلاف پی ایم ایل اے کے تحت ایکشن لیا جائے۔ یعنی جہانگیر پوری معاملہ میں جلد ہی ای ڈی کی کارروائی دیکھنے کو مل سکتی ہے۔ قابل ذکر ہے کہ انصار کو جہانگیر پوری تشدد معاملہ کا ماسٹر مائنڈ بتایا جا رہا ہے، حالانکہ کچھ لوگوں کا کہنا ہے کہ انصار کو بلاوجہ پھنسایا جا رہا ہے۔

اپنے ہندوستان دورہ کے دوسرے دن برطانوی وزیر اعظم بورس جانسن راجدھانی دہلی پہنچے۔ انھوں نے یہاں راج گھاٹ پر پہنچ کر مہاتما گاندھی کو خراج عقیدت پیش کیا۔ جلد ہی وہ وزیر اعظم نریندر مودی کے ساتھ دو فریقی مذاکرہ میں حصہ لیں گے۔