اہم خبر: نظامِ قانون کے معاملہ میں یو پی کی یوگی حکومت سب سے بدتر... ٹاٹا ٹرسٹ

وزیر اعلی یوگی آدتیہ ناتھ 
وزیر اعلی یوگی آدتیہ ناتھ

قومی آوازبیورو

7 Nov 2019, 4:08 PM

یوگی آدتیہ ناتھ کی ریاست میں نظامِ قانون سب سے بدتر: ٹاٹا ٹرسٹ

اتر پردیش میں خراب نظام قانون کسی سے پوشیدہ نہیں ہے، اور اب ٹاٹا ٹرسٹ کے ’انڈیا جسٹس رپورٹ 2019‘ نے بھی اس بات پر مہر ثبت کر دی ہے۔ اس رپورٹ میں بتایا گیا ہے کہ بڑے شہروں میں نظام قانون کا معاملہ دیکھا جائے تو اتر پردیش کی رینکنگ سب سے خراب ہے اور اس کے بعد نمبر بہار کا آتا ہے۔ سب سے بہتر نظام قانون مہاراشٹر کا سامنے آیا ہے۔ اس کے بعد بہتر نظام قانون کے معاملے میں کیرالہ کا نمبر آتا ہے۔ تیسرے مقام پر تمل ناڈو ہے۔

7 Nov 2019, 2:59 PM

ایودھیا معاملہ پر سپریم کورٹ کے فیصلے کا سبھی کریں احترام: مایاوتی

ایودھیا معاملہ پر سپریم کورٹ کا فیصلہ آنے سے پہلے وزیر اعظم سمیت تمام پارٹیوں کے لیڈران نے لوگوں سے خیر سگالی بنائے رکھنے کی اپیل کی ہے۔ بی ایس پی سربراہ مایاوتی نے بھی اس سلسلے میں جمعرات کو ایک ٹوئٹ کیا جس میں انھوں نے لکھا کہ ’’ایودھیا معامے میں جلد ہی سپریم کورٹ کا فیصلہ آنے کا امکان ہے جسے لے کر عوام میں بے چینی اور اندیشے ہونا فطری ہے۔ ایسے میں ملک کے سبھی باشندوں سے اپیل ہے کہ وہ سپریم کورٹ کے فیصلے کا ہر حال میں احترام کریں۔ یہی ملک کے مفاد اور عوام کے مفاد میں بہتر طریقہ ہے۔‘‘

7 Nov 2019, 1:32 PM

وارانسی: آلودگی سے بچانے کے لیے مہادیو مندر میں ’شیو لنگ‘ کو پہنایا گیا ’ماسک‘

وارانسی کے تارکیشور مہادیو مندر میں ’شیولنگ‘ پر ماسک لگایا گیا ہے۔ بھکتوں کا اس سلسلے میں کہنا ہے کہ ’’شہر میں ہوا آلودہ ہے اور بھولے بابا کو اس زہریلی ہوا سے بچانے کے لیے ہم نے ماسک پہنایا ہے۔ ہمیں یقین ہے کہ اگر وہ محفوظ ہیں تو ہم محفوظ رہیں گے۔‘‘

7 Nov 2019, 12:37 PM

تیس ہزاری کورٹ واقعہ کے میڈیا کوریج پر روک لگانے کی عرضی سپریم کورٹ سے خارج

تیس ہزاری کورٹ واقعہ کے میڈیا کوریج سے ناراض وکیلوں نے سپریم کورٹ میں ایک عرضی داخل کی تھی جس میں کہا گیا تھا کہ اس معاملہ پر میڈیا کوریج کی اجازت نہیں دی جانی چاہیے۔ اس عرضی کو سپریم کورٹ نے سننے سے انکار کر دیا ہے۔ واضح رہے کہ 2 نومبر کو تیس ہزاری کورٹ میں وکیلوں اور پولس کے درمیان تصادم ہو گیا تھا جو سرخیوں میں ہے۔ یہ معاملہ کافی بڑھ گیا ہے اور لاتعداد دہلی پولس اہلکاروں نے دہلی پولس ہیڈکوارٹر پر زبردست دھرنا و مظاہرہ بھی کیا تھا۔

7 Nov 2019, 11:32 AM

پاکستان: عمران خان مخالف دھرنا و مظاہرہ اتوار تک جاری رکھنے کا اعلان

اسلام آباد: پاکستان میں خراب موسم اور سیاسی بحران ختم کرنے کیلئےساتھیوں کے دباؤ کے باوجود ملک کے بڑے مذہبی لیڈر اور جماعت علمائے اسلام- فضل الرحمن (جےيوآئی-ایف) کے سربراہ مولانا فضل الرحمن نے عمران خاں حکومت مخالف دھرنے کو اتوار تک جاری رکھنے کا اعلان کیا ہے۔ مولانا فضل الرحمن نے ’آزادی مارچ‘ کے دوران دھرنا کے چھٹے دن بھاری بارش اور سردی کے درمیان بدھ کی رات کو اپنے حامیوں سے خطاب کرتے ہوئے کہا کہ ان کی پارٹی نے اتوار کو پڑنے والے 12 ویں ربیع الاول کے موقع پر ایک سیرت کانفرنس منعقد کرنے کا فیصلہ کیا ہے۔

(یو این آئی)

7 Nov 2019, 10:11 AM

مخالفین پر حملے کے لیے پی ایم مودی اور امت شاہ ’ترشول‘ کا کر رہے استعمال: جے رام رمیش

کانگریس کے سینئر لیڈر جے رام رمیش نے پی ایم مودی اور مرکزی وزارت داخلہ امت شاہ کو پرزور طریقے سے تنقید کا نشانہ بنایا ہے۔ انھوں نے کہا کہ نریندر مودی اور امت شاہ کے ہاتھ میں ایک ’ترشول‘ ہے جس کے ذریعہ وہ اپنے مخالفین پر حملہ آور ہو رہے ہیں۔ انھوں نے کہا کہ یہ ترشول سی بی آئی، انفورسمنٹ ڈائریکٹوریٹ اور انکم ٹیکس ہے۔

7 Nov 2019, 8:34 AM

کے پی ایل میچ فکسنگ: بیلاری ٹیم کے کپتان سی ایم گوتم اور ابرار قاضی گرفتار

کرناٹک پریمیر لیگ یعنی کے پی ایل میچ فکسنگ کیس میں سنٹرل کرائم برانچ نے دو مزید لوگوں کو گرفتار کر لیا ہے۔ میڈیا ذرائع کے مطابق کرائم برانچ کے ذریعہ جن دو لوگوں کی تازہ گرفتاری ہوئی ہے وہ بیلاری ٹیم کے کپتا سی ایم گوتم اور بیلاری ٹیم کے ہی کھلاڑی ابرار قاضی ہیں۔ کرائم برانچ کی ٹیم ان دونوں سے ہی پوچھ تاچھ کر رہی ہے اور انھیں امید ہے کہ میچ فکسنگ معاملہ میں کچھ اہم جانکاریاں ملیں گی۔