طلاق ثلاثہ بل شریعت میں مداخلت :پرسنل لاء بورڈ

پرسنل لاء بورڈ کی مجلس عاملہ نےجہاں حکومت کے بل کو یکسر مسترد کر دیا ہے وہیں حکومت سے درخواست کی ہے کہ کوئی بھی بل ہو اس پر مسلم تنظیموں سے مشورہ کی رائے لینا ضروری ہے۔

لکھنؤ: آل انڈیا مسلم پرسنل لا بورڈکی مجلس عاملہ نے حکومت کا پیش کردہ مجوزہ شادی شدہ مسلم خواتین کے حقوق کے تحفظ سے متعلق بل کو یکستر مسترد کرتے ہوئے اعلان کیا ہے کہ یہ مسلمانان ہند کے لئے کسی طرح بھی قابل قبول نہیں ہے۔ بورڈ نے کہا کہ بل خودمسلمان خواتین کے حقوق کے خلاف ہے اور ان کی الجھنوں ، پریشانیوں اور مشکلات میں اضافے کا سبب ہے، اسی طرح یہ شریعت اسلامی میں کھلی ہوئی مداخلت اور آئین ہند میں دی گئی مذہبی آزادی کی بنیادی دفعہ اورسپریم کورٹ کے تین طلاق کے سلسلہ میں دیے گئے حالیہ فیصلے کے خلاف بھی ہے۔ بورڈ نے کہا کہ یہ بات بھی واضح رہنی چاہئے کہ اس بل کے مشمولات متضاد ہیں ، جہاں ایک طرف اس بل میں تین طلاق کے بے اثر اور باطل ہونے کی بات کہی گئی ہے وہیں تین طلاق کو جرم قرار دے کر تین سال کی سزا اور جرمانہ کی بات موجودہے، سوال یہ ہے کہ جب تین طلاق واقع ہی نہیں ہوگی تو اس پر سزا کیوں کر دی جاسکتی ہے۔

اس بل کی دفعات7,6,5,4 ملک میں پہلے سے موجود قوانین ،مثلا Guardian and wards Act وغیرہ سے ٹکراتی ہیں اور دستور ہند کی دفعہ 15,14کے خلاف ہیں کیونکہ اس بل میں ان مسلمان عورتوں کو جن کو بیک وقت تین طلاق دی گئی ہو اور دیگر مسلم خواتین میں بغیر کسی جواز کے تفریق کی گئی ہے اور شوہر کو مجرم قرار دیے جانے کے سلسلہ میں خود اس کی منکوحہ کی مرضی اور منشا کو بھی نظر انداز کیا گیا ہے، حد تو یہ ہے کہ بچوں کی فلاح و بہبود کے معاملہ پر سرے سے توجہ ہی نہیں دی گئی ہے۔

یہ بات حیران کردینے والی ہے کہ جس کمیونٹی کے بارے میں یہ بل پیش کیا گیا ہے نہ اس کے ذمہ داران اور قائدین سے مشورہ لیا گیااور نہ کسی مسلم تنظیم اور ادارے سے رابطہ کیا گیا اورنہ خواتین کے معتمداداروں سے مشورہ کیا گیا،اس لئے اس بل کے سلسلہ میں ہمارا مطالبہ ہے کہ حکومت ابھی اس مجوزہ بل کو پارلیمنٹ میں پیش نہ کرے بلکہ اگر ضرورت محسوس کی جائے تو آل انڈیا مسلم پرسنل لا بورڈ اور مسلم خواتین کی صحیح نمائندگی کرنے والی تنظیموں اور اداروں سے مشورے کے بعد ایسا بل پیش کیا جائے جو خواتین کے حقوق کا تحفظ کرنے والا، شریعت اسلامی اور آئین ہند سے مطابقت رکھنے والا ہو۔

چونکہ یہ بل شریعت اسلامی اور آئین ہند دونوں کے خلاف ہے ، نیزمسلم خواتین کے حقوق کو متأثر کرنے والا ہے اس لئے آل انڈیا مسلم پرسنل لا بورڈاس کے سدباب کی کوششیں شروع کرچکا ہے اور آنے والے دنوں میں بھی ہر سطح پر بھر پور کوشش کرے گا۔