افطار کے لیے مغلئی گلاب جامن کباب، شاہی ذائقے کا منفرد تجربہ

افطار میں روایتی پکوڑوں، سموسوں اور رول سے ہٹ کر کچھ خاص بنانے کا ارادہ ہو تو مغلئی گلاب جامن کباب ایک شاہی انتخاب ہے۔ یہ نام سنتے ہی ذہن میں مٹھاس کا تصور آتا ہے لیکن یہ ڈش اپنے نام کے برعکس ایک نمکین اور لذیذ پکوان ہے، جس میں کھوئے اور بادام کی فلنگ بھر کر قیمے کے کباب تیار کیے جاتے ہیں۔ ان کبابوں کی نرمی اور بھرپور ذائقہ افطار کے دسترخوان کو شاہی شان بخشتا ہے۔

اجزاء:

مٹن یا بڑے کا قیمہ: 500 گرام (باریک پسا ہوا)

کھویا: 100 گرام (چورا کیا ہوا)

بادام: 10-12 عدد (چھیل کر باریک کٹے ہوئے)

پیاز: 1 درمیانی (باریک کٹی ہوئی)

ادرک لہسن کا پیسٹ: 1 کھانے کا چمچ

ہری مرچ: 2 عدد (باریک کٹی ہوئی)

گرم مسالہ: 1 چائے کا چمچ

لال مرچ پاؤڈر: 1 چائے کا چمچ

دھنیا پاؤڈر: 1 چائے کا چمچ

زیرہ پاؤڈر: 1 چائے کا چمچ

نمک: حسب ذائقہ

انڈا: 1 عدد (کباب سیٹ کرنے کے لیے)

گھی یا تیل: تلنے کے لیے

دودھ: 2 کھانے کے چمچ (قیمے میں ملانے کے لیے)

ترکیب:

قیمے کی تیاری:

قیمے میں ادرک لہسن کا پیسٹ، لال مرچ، گرم مسالہ، دھنیا پاؤڈر، زیرہ پاؤڈر اور نمک ڈال کر اچھی طرح مکس کریں۔

اس میں دودھ اور انڈا شامل کر کے آدھے گھنٹے کے لیے میرینیٹ ہونے دیں تاکہ کباب نرم اور جوسی بن سکیں۔

فلنگ کی تیاری:

کھوئے میں باریک کٹے بادام اور ہری مرچیں مکس کریں۔

اس آمیزے کو چھوٹے چھوٹے گلاب جامن کے سائز کے گیندوں میں بنا لیں۔

کباب بنانا:

قیمے کے چھوٹے حصے لے کر ہاتھ سے پھیلا کر رکھیں۔

درمیان میں کھوئے اور بادام کی گیند رکھ کر قیمے سے ڈھانپ کر گلاب جامن کی شکل دیں۔

تمام کباب اسی طرح تیار کر لیں۔

تلنا:

کڑاہی میں درمیانی آنچ پر تیل گرم کریں۔

کبابوں کو سنہری اور خستہ ہونے تک فرائی کریں۔

تلنے کے بعد کبابوں کو ٹشو پیپر پر رکھ کر اضافی تیل جذب کر لیں۔

مغلئی گلاب جامن کباب کو پودینے کی چٹنی یا املی کی چٹنی کے ساتھ پیش کریں۔ ساتھ میں ہلکی سی پیاز اور ٹماٹر کی سلاد بھی رکھیں۔ یہ کباب نہ صرف افطار کے دسترخوان کی رونق بڑھاتے ہیں بلکہ ذائقے میں بھی یادگار ثابت ہوتے ہیں۔