لوک سبھا انتخابات: 102 سیٹوں پر ووٹنگ ختم، ووٹ کا فیصد مغربی بنگال میں سب سے زیادہ اور بہار میں سب سے کم

پہلے مرحلہ کی ووٹنگ ختم ہو چکی ہے اور 102 لوک سبھا سیٹوں پر کھڑے ہوئے 1625 امیدواروں کی قسمت کا فیصلہ اب 4 جون کو سامنے آئے گا۔ ابھی تک ڈالے گئے ووٹوں کا حتمی فیصد سامنے نہیں آیا ہے، لیکن 5 بجے تک کے جو اعداد و شمار سامنے آئے ہیں اس کے مطابق تشدد کے کچھ واقعات کا سامنا کرنے والی ریاست مغربی بنگال میں سب سے زیادہ 77.57 فیصد ووٹنگ ہوئی ہے۔ بہار میں 5 بجے تک سب سے کم 46 فیصد ووٹنگ کی خبریں سامنے آ رہی ہیں۔

لوک سبھا انتخاب کے پہلے مرحلے میں شام 6 بجے پولنگ کا عمل انجام پا گیا۔ کچھ مقامات پر ووٹ دینے کے لیے قطار میں زیادہ لوگ موجود تھے جہاں مقررہ وقت کے کچھ دیر بعد تک ووٹ ڈالا گیا۔ پہلے مرحلہ میں 102 سیٹوں پر ووٹ ڈالے گئے ہیں اور اب مجموعی طور پر 1625 امیدواروں کی قسمت کا فیصلہ ای وی ایم میں بند ہو گیا ہے۔ فی الحال ڈالے گئے ووٹ کا حتمی فیصد سامنے نہیں آیا ہے، لیکن موصولہ اطلاع کے مطابق 5 بجے تک تقریباً 63 فیصد ووٹ ڈالے گئے ہیں۔

لوک سبھا انتخاب کے پہلے مرحلہ کی ووٹنگ جاری ہے۔ اس درمیان منی پور کے امپھال واقع موئرنگ کمپو ساجیب اوانگ لیکائی میں ایک پولنگ سنٹر پر نامعلوم بدمعاشوں کے ذریعہ گولی باری اور تصادم کا واقعہ پیش آیا ہے۔ اس حادثہ میں ایک شخص زخمی ہو گیا۔ موئرانگ کمپو کی بلاک سطح افسر ساجیب سربالا دیوی نے بتایا کہ اچانک یہاں دو لوگ پہنچے اور کانگریس و بی جے پی کے پولنگ ایجنٹس کے بارے میں پوچھا۔ وہ کانگریس ایجنٹ کا ہاتھ پکڑ کر باہر لے گئے۔ پھر دو لوگوں نے کار کے اندر سے گولیاں چلائیں جس میں ایک شخص زخمی ہو گیا۔

بہار کی 4 لوک سبھا سیٹوں کے لیے آج ووٹ ڈالے جا رہے ہیں۔ ووٹرس اپنے حق رائے دہی کا استعمال 6 بجے تک کر سکیں گے، لیکن نکسل متاثرہ کچھ علاقوں میں ووٹنگ کا عمل انجام پا گیا ہے۔ ان علاقوں میں ووٹ ڈالنے کے لیے 4 بجے تک کا ہی وقت مقرر کیا گیا تھا اور اس کے مطابق اب ووٹنگ ختم ہو گئی ہے۔ اورنگ آباد ضلع کے کٹمبا، رفیع گنج اور گیا ضلع کے امام گنج، گروا و ٹیکاری میں 4 بجے تک ووٹ ڈالے گئے ہیں۔ علاوہ ازیں گیا لوک سبھا کے تین اسمبلی حلقوں شیر گھاٹی، باراچٹی اور بودھ گیا میں بھی شام 4 بجے ووٹنگ کا عمل انجام پا گیا۔

لوک سبھا انتخابات کے پہلے مرحلے کے تحت ملک کی 21 ریاستوں اور مرکز کے زیر انتظام علاقوں میں ووٹنگ جاری ہے۔ رپورٹ کے مطابق سہ پہر تین بجے تک تمام سیٹوں پر مجموعی طور پر 50 فیصد پولنگ درج کی گئی۔

منی پور میں لوک سبھا انتخابات کے لیے پہلے مرحلہ کی ووٹنگ کے درمیان تشدد بھڑک اٹھا۔ بشنو پور لوک سبھا حلقہ میں پولنگ بوتھ پر فائرنگ کی گئی۔ فائرنگ کے بعد مشتعل بھیڑ نے ای ایو ایم کو توڑ دیا۔

21 ریاستوں میں دوپہر 1 بجے تک ووٹنگ کا اوسط 36.96 فیصد ہے۔

1. تریپورہ- 53.04 %

2. مغربی بنگال- 50.96 %

3. میگھالیہ- 48.91 %

4. منی پور- 45.68 %

5. آسام- 45.12 %

6. پڈوچیری- 44.95 %

7. مدھیہ پردیش- 44.18 %

8. جموں و کشمیر- 43.11 %

9. چھتیس گڑھ- 42.57 %

10. تمل ناڈو- 39.43 %

11. ناگالینڈ- 38.83 %

12. اتراکھنڈ- 37.33 %

13. اتر پردیش- 36.96 %

14. سکم - 36.82 %

15. میزورم- 36.67 %

16. انڈمان- 35.70 %

17. اروناچل پردیش- 34.99 %

18. راجستھان- 33.73 %

19. بہار- 32.41 %

20. مہاراشٹر- 32.36%

21. لکشدیپ-29.91 %

منی پور میں سخت حفاظتی انتظامات کے باوجود لوک سبھا انتخابات کے پہلے مرحلے کی ووٹنگ کے دوران تشدد بھڑک اٹھا۔ دی ہندو کی رپورٹ کے مطابق منی پور کے مویرانگ اسمبلی حلقے کے تھامن پوکپی میں پولنگ بوتھ پر فائرنگ کی گئی۔ وہیں چھتیس گڑھ کے بیجاپور سے دھماکہ کی اطلاع موصول ہوئی۔ رپورٹ کے مطابق بیجاپور کے چہکا گاؤں میں الیکشن ڈیوٹی کے دوران آئی ای ڈی دھماکہ ہوا، جس میں سی آر پی ایف کے ایک اسسٹنٹ کمانڈنٹ زخمیو ہو گئے۔ پولیس نے دھماکی کی تصدیق کی ہے۔

لوک سبھا انتخابات 2024 کے پہلے مرحلے میں جن 102 سیٹوں پر ووٹ ڈالے جا رہے ہیں، ان میں مہاراشٹر کی بھنڈارا کی سیٹ بھی ہے۔ مہاراشٹر پردیش کانگریس کے صدر نانا پٹولے نے بھنڈارا میں پولنگ بوتھ پراپنا ووٹ ڈالا۔

کوچ بہار سے کانگریس کی امیدوار پیا رائے چودھری نے اپنا ووٹ ڈالا۔ بی جے پی نے یہاں سے مرکزی وزیر نیسیت پرمانک کو میدان میں اتارا ہے۔

الیکشن کمیشن کے مطابق صبح 11 بجے تک جزائر انڈمان نکوبار میں 21.82 فیصد، اروناچل پردیش میں 19.34 فیصد، آسام میں 27.22 فیصد، بہار میں 20.42 فیصد، چھتیس گڑھ میں 28.12 فیصد، جموں و کشمیر میں 22.60 فیصد، لکشدیپ میں 16.3 فیصد ووٹ ڈالے گئے۔

اس کے علاوہ مدھیہ پردیش میں 30.46 فیصد، مہاراشٹر میں 19.17 فیصد، منی پور میں 25.84 فیصد، میگھالیہ میں 33.12 فیصد، میزورم میں 27 فیصد، ناگالینڈ میں 23.28 فیصد، پڈوچیری میں 28.10 فیصد، راجستھان میں 22.51 فیصد، سکم میں 21.20 فیصد، تمل ناڈو میں 23.72، تریپورہ میں 34.54 فیصد، اتر پردیش میں 25.20 فیصد، اتراکھنڈ میں 24.83 فیصد اور مغربی بنگال میں 33.56 فیصد ووٹنگ ہوئی۔

لوک سبھا انتخابات کے پہلے مرحلہ کے تحت یوپی کی 8 سیٹوں پر جاری ووٹنگ کے درمیان سماجوادی پارٹی نے الزام عائد کیا ہے کہ خاص مذہب سے تعلق رکھنے والوں کو بی جے پی کے لوگوں کی طرف سے دھمکایا جا رہا ہے۔ ایس پی نے ایکس پر لکھا، ’’مرادآباد لوک سبھا کے ٹھاکر دوارا میں بوتھ نمبر 381، 382، 383 پر بی جے پی کے لوگو خاص مذہب کے لوگوں کو دھمکا رہے ہیں۔ الیکشن کمیشن اس کا نوٹس لے، غیرجانب دارانہ انتخابات کو یقینی بنایا جائے۔

پہلے مرحلے کے تحت اتر پردیش کی 8 سیٹوں پر ووٹنگ جاری ہے۔ مظفرنگر میں صبح 9 بجے تک 12.1 فیصد پولنگ درج گیا، جبکہ بجنور میں 9.3 فیصد پولنگ درج ہوا۔ اس کے علاوہ سہارنپور میں 11 فیصد، مرادآباد میں 11.76 فیصد، کیرانہ میں 9.2 فیصد، نگینہ میں 13.9 فیصد اور پیلی بھیت میں 13.36 فیصد پولنگ درج کیا گیا۔

پہلے مرحلے کی ووٹنگ کے دوران جمعیۃ علماء ہند کے صدر مولانا ارشد مدنی نے ووٹروں سے صد فیصد ووٹنگ کی اپیل کی ہے۔ انہوں نے ایکس پر لکھا، ’’ووٹ ہمارا جمہوری حق ہے۔ آئین، سیکولرازم اور جمہوریت کی حفاظت کے لئے صد فیصد ووٹنگ کریں۔‘‘

کانگریس نے اپنے ایکس ہینڈل پر لکھا، ’’آپ کا ایک ووٹ مہنگائی، بے روزگاری، نفرت اور ناانصافی کو مٹا سکتا ہے۔ ووٹ ضرورت دیں۔ اپنے ایک ووٹ سے مہنگائی، بے روزگاری، نفرت اور ناانصافی کو ہرائیں۔‘‘

وزیر اعظم نریندر مودی نے کہا، "جمہوریت کا سب سے بڑا جشن آج سے شروع ہو رہا ہے۔ لوک سبھا انتخابات کے پہلے مرحلے میں 21 ریاستوں اور مرکز کے زیر انتظام علاقوں کی 102 سیٹوں کے لیے ووٹ ڈالے جائیں گے۔ ان تمام سیٹوں کے ووٹروں سے میری درخواست ہے کہ اپنے حق رائے دہی کا استعمال کریں اور ووٹنگ کا نیا ریکارڈ بنائیں، میری ان نوجوان دوستوں سے خصوصی اپیل ہے جو پہلی بار ووٹ ڈالنے جا رہے ہیں، کہ وہ بڑی تعداد میں ووٹ ڈالیں۔‘‘

سابق مرکزی وزیر اور کانگریس کے رہنما پی چدمبرم نے تمل ناڈو کے شیو گنگا میں اپنے حق رائے دہی کا استعمال کیا۔ ووٹ دینے کے بعد انہوں نے کہا، ’’مجھے بہت خوشی اور فخر ہے کہ میں لوک سبھا کے انتخابات میں اپنا ووٹ ڈال سکا۔ جہاں تک تمل ناڈو کا تعلق ہے، مجھے یقین ہے کہ انڈیا بلاک تمام 39 پارلیمانی نشستوں پر سیٹوں پر جیت درج کرے گا۔‘‘

آر ایس ایس سربراہ موہن بھاگوت نے مہاراشٹر کے شہر ناگپور میں ووٹ ڈالا ہے۔ اپنا ووٹ ڈالنے کے بعد موہن بھاگوت نے کہا، ’’ووٹ دینا ہمارا فرض ہے، ووٹ دینا ہمارا حق ہے، صد فیصد ووٹنگ ہونی چاہیے، اس لیے آج میں نے پہلا کام ووٹ دینے کا کیا ہے۔‘‘

لوک سبھا انتخابات 2024 کے پہلے مرحلے کے تحت 21 ریاستوں اور مرکز کے زیر انتظام علاقوں کی 102 نشستوں پر ووٹنگ شروع ہو چکی ہے۔ اس مرحلے میں 1600 سے زائد امیدوار میدان میں ہیں، جن میں 9 مرکزی وزراء، 2 سابق وزرائے اعلیٰ اور ایک سابق گورنر شامل ہیں۔ ووٹنگ صبح 7 بجے سے شروع ہوئی، جو کہ شام 6 بجے تک جاری رہے گی۔ آج اروناچل پردیش اور سکم کی 92 اسمبلی سیٹوں پر بھی ووٹنگ ہو رہی ہے۔

الیکشن کمیشن کے مطابق پہلے مرحلے میں 16.63 کروڑ سے زیادہ ووٹر اپنے حق رائے دہی کا استعمال کر رہے ہیں۔ ان میں 8.4 کروڑ مرد اور 8.23 ​​کروڑ خواتین ووٹر ہیں۔ ان میں سے 35.67 لاکھ ووٹر ایسے ہیں جو پہلی بار ووٹ ڈال رہے ہیں، جبکہ 20 سے 29 سال کی عمر کے ووٹروں کی تعداد 3.51 کروڑ ہے۔ ان کے لیے 1.87 لاکھ پولنگ بوتھ بنائے گئے ہیں۔

سی ای سی راجیو کمار نے کہا، ’’ہم نے بہت محنت کی ہے۔ ہم نے سیکورٹی کے حوالے سے کافی تیاریاں کی ہیں، حالانکہ زیادہ تر ریاستوں میں تشدد کا کوئی مسئلہ نہیں ہے۔ اب تک کوئی تشدد نہیں ہوا ہے۔‘‘