الیکشن کمیشن نے بجایا عام انتخابات کا بگل، لوک سبھا انتخابات 2024 کی تاریخوں کا اعلان

پریس کانفرنس سے خطاب کرتے ہوئے راجیو کمار نے بتایا کہ عام انتخابات 7 مراحل میں ہوں گے اور پہلے مرحلہ کے لیے 19 مارچ کو 102 سیٹوں پر پولنگ ہوگی۔ ووٹوں کی گنتی 4 جون کو ہوگی اور 6 جون کو انتخابات کو مکمل قرار دیا جائے گا۔

سی ای سی راجیو کمار نے کہا، ’’ہمارا عہد ہے کہ ہم ملکی انتخابات ایسے انداز میں منعقد کریں گے کہ ہندوستان کی شہرت عالمی سطح پر روشن ہو سکے۔ ہر انتخاب آئین کی جانب سے دی گئی ایک مقدس ذمہ داری ہے۔ الیکشن کمیشن غیر جانبدارانہ اور شفاف انتخابات کے لئے اپنی پختہ عہد مندی پر قائم ہے۔‘‘

چیف الیکشن کمشنر راجیو کمار نے کہا، ’’ہم قوم کو ایک حقیقی جشنی اور جمہوری ماحول فراہم کرنے کے لئے پرعزم ہیں۔ سترہویں لوک سبھا کی مدت 16 جون 2024 کو ختم ہو رہی ہے۔ آندھرا پردیش، اوڈیشہ، اروناچل پردیش اور سکم کی قانون ساز اسمبلیوں کی مدت بھی جون 2024 میں ختم ہو رہی ہے۔ جموں و کشمیر میں بھی انتخابات ہونے ہیں۔‘‘

انہوں نے مزید کہا، ’’ہمارے پاس تقریباً 97 کروڑ رجسٹرڈ ووٹرز، 10.5 لاکھ پولنگ اسٹیشنز، 1.5 کروڑ پولنگ اہلکار اور سیکورٹی عملہ، 55 لاکھ الیکٹرانک ووٹنگ مشینیں، اور 4 لاکھ گاڑیاں ہیں۔‘‘

چیف الیکشن کمشنر نے کہا، ’’ملک میں 29 سال تک کی عمر کے قریب 21.5 کروڑ نوجوان ووٹرز ہیں۔ 1.82 کروڑ ووٹر ایسے ہیں جو پہلی بار ووٹ دیں گے۔ یہ تمام افراد اپنے مستقبل کا فیصلہ کرنے کے لیے ووٹ ڈالیں گے۔ اس ملک میں کل ووٹرز کی تعداد 96.8 کروڑ ہے، جن میں سے 49.7 کروڑ مرد اور 47 کروڑ خواتین شامل ہیں۔‘‘

چیف الیکشن کمشنر راجیو کمار دونوں الیکشن کمشنروں گیانیش کمار اور سکھبیر سنگھ سندھو کے ساتھ وگیان بھون میں پریس کانفرنس کر رہے ہیں۔ راجیو کمار پریس کانفرنس کے آغاز میں عام انتخابات سے متعلق معلومات فراہم کر رہے ہیں۔

الیکشن کمیشن کے دفتر میں لوک سبھا انتخابات 2024 کی تاریخوں کے اعلان کے لئے اسٹیج تیار کر لیا گیا ہے۔ تھوڑی دیر میں چیف الیکشن کمشنر راجیو کمار انتخابی تاریخوں کا اعلان کریں گے۔

الیکشن کمیشن آج یعنی ہفتہ (16 مارچ) کو لوک سبھا انتخابات کے لئے تاریخوں کا اعلان کرنے جا رہا ہے۔ انتخابی شیڈول کا اعلان ہوتے ہی ملک میں ضابطہ اخلاق نافذ ہو جائے گا۔ انتخابی کمیشن لوک سبھا انتخابات کے ساتھ ساتھ کچھ صوبائی اسمبلی کے انتخابات کے شیڈول کا بھی اعلان کرے گا۔ انتخابات کی تاریخوں کا اعلان ہفتہ کی دوپہر 3 بجے کیا جائے گا۔