اہم خبریں: بہار الیکشن انچارج کے طور پر فڑنویس کی تقرری

نئی دہلی: بھارتیہ جنتا پارٹی (بی جے پی) کے قومی صدر جے پی نڈا نے مہاراشٹر کے سابق وزیر اعلیٰ دیویندر فڑنویس کو آئندہ بہار اسمبلی انتخابات کے لیے انتخابی انچارج مقرر کیا ہے۔ الیکشن کمیشن کے اعلان کے مطابق بہار میں تین مرحلوں میں 28 اکتوبر، تین اور سات نومبر کو ووٹنگ ہوگی جبکہ 10 نومبر کو نتائج کا اعلان ہوگا۔

کانگریس کے ترجمان رندیپ سورجے والا نے کہا کہ بابری مسجد انہدام کے ملزمین کو رہا کرنے کا فیصلہ سپریم کورٹ کے فیصلے اور آئین کے منافی ہے، سپریم کورٹ کی 5 رکنی بنچ نے مسجد انہدام کو غیر قانونی قرار دیا تھا۔

ہاتھرس کے ڈی ایم نے بتایا کہ "رات 12.45 بجے کے قریب لاش گاؤں لائی گئی، میری متاثرہ کے والد اور بھائی سے بات ہوئی، انہوں نے اس بات پر اتفاق کیا کہ متاثرہ کی آخری رسومات رات کے وقت ہی ادا کی جائیں۔ متاثرہ کی لاش جس گاڑی میں تھی وہ تقریباً ایک سے ڈیڑھ گھنٹے تک اس کے گھر پر کھڑی رہی اور پورا کنبہ وہاں موجود تھا جب آخری رسومات ادا کی گئیں۔ متاثرہ کی آخری رسومات 3 بجے کے قریب ادا کی گئیں۔ "

ہاتھرس: اترپردیش کے ہاتھرس میں جواں سال خاتون کے ساتھ ہونے والی بربریت کے بعد صورتحال کشیدہ بنی ہوئی ہے اور اب جھڑپ کی بھی اطلاع موصول ہو رہی ہے۔ میڈیا رپورٹ کے مطابق، کانگریس کے کچھ کارکن اور مقامی افراد تالاب کے چوراہے کے قریب احتجاجاً دکانیں بند کر رہے تھے۔ جب پولیس نے انہیں روکنے کی کوشش کی تو پتھر شروع ہو گیا۔ اس کے بعد پولیس نے لاٹھی چارج کیا اور آنسو گیس کے گولے بھی داغے۔ میڈیا رپورٹ کے مطابق ایک موٹرسائیکل کو نذر آتش کر دیا گیا۔ حالانکہ اب صورتحال قابو میں بتائی جا رہی ہے۔

ہاتھرس گینگ ریپ کی متاثرہ کی موت کے ایک طرف جہاں حزب اختلاف یوگی حکومت پر حملہ آور ہے وہیں دوسری طرف وزیر اعظم مودی نے وزیر اعلیٰ یوگی آدتیہ ناتھ سے بات کر کے حالات کا جائزہ لیا ہے۔ یوگی آدتیہ ناتھ نے ٹوئٹ کر کے اطلاع دی، ’’وزیر اعظم مودی نے ہاتھرس کے واقعہ پر گفتگو کی اور کہا کہ قصورواروں کے خلاف سخت سے سخت کارروائی عمل میں لائی جائے۔ اس معاملہ کی جانچ کے لئے اتر پردیش حکومت نے ایس آئی ٹی تشکیل دے دی ہے۔

قبل ازیں، کانگریس ترجمان رندیپ سنگھ سرجے والا نے ٹوئٹ کیا، ’’ہاتھرس میں والمیکی سماج کے کنبہ پر ظلم و بربریت کی تمام حدود پار۔ ماں باپ سے بیٹی کے انتم سنسکار کا حق کسیے اور کیوں چھینا؟ رات کے اندھیرے میں ڈھائی بجے انتم سنسکار کیوں کیا؟ یوگی استعفیٰ دو۔‘‘

اتر پردیش کے ہاتھرس میں 19 سالہ لڑکی کی مبینہ اجتماعی عصمت دری کے بعد موت سے پہلے ہی عوام میں غصہ تھا لیکن موت کے بعد اس کی لاش کو کو اس کے اہل خانہ کو نہ دے کر اس غصہ میں مزید اضافہ کر دیا ہے۔ نیوز 18 میں شائع خبر کے مطابق اس لڑکی کے انتقال کے بعد پولیس اور ضلع انتظامیہ کا شرمناک چہرا سامنے آیا ہے۔خبر کے مطابق دہلی سے اس لڑکی کی میت کو اس کے اہل خانہ کو نہیں دیا اور رات کو دو بجے کے بعد ہی اس کی آخری رسومات ادا کر دیں۔