اہم خبریں: مسجد-مندر اور ذات پات کی سیاست کرتی ہے بی جے پی... سچن پائلٹ

کانگریس لیڈر سچن پائلٹ نے آج بلند شہر میں کانگریس امیدوار کے لیے انتخابی تشہیر کی۔ اس دوران انھوں نے بی جے پی کی پالیسیوں اور غلط طرز حکمرانی کی خوب تنقید کی۔ انھوں نے اپنے بیان میں کہا کہ بی جے پی ترقی کی سیاست نہیں کرتی، وہ مسجد-مندر اور ذات پات کی سیاست کرتی ہے۔

گوا میں ورچوئل ریلی سے خطاب کرتے ہوئے راہل گاندھی نے کانگریس حکومت بننے پر غریبوں کے لیے ’نیائے اسکیم‘ پر عمل کرنے کا وعدہ کیا۔ انھوں نے کہا کہ ’’ہم گوا کے لوگوں کے لیے نیائے اسکیم لائیں گے۔ ہم ہر مہینے 6 ہزار روپے گوا کے سب سے غریب شخص کے بینک اکاؤنٹ میں ڈالیں گے۔ 72 ہزار روپے سالانہ آپ کے بینک اکاؤنٹ میں دیے جائیں گے۔‘‘

کانگریس کے سابق صدر راہل گاندھی آج گوا کے دورے پر گئے جہاں انہوں نے پارٹی امیدواروں کے لئے مہم چلائی۔ اس دوران تمام امیدواروں نے راہل گاندھی کی موجودگی میں گوا کے باشندگان کی خوشحالی اور گوا کی ترقی کے تئیں وفاداری کا عہد لیا۔

کانگریس جنرل سکریٹری پرینکا گاندھی نے کہا، ’’ہم اپنی پوری قوت کے ساتھ مقابلہ کر رہے ہیں۔ 30 برسوں میں یہ پہلا موقع ہے کہ ہماری پارٹی تمام 403 سیٹوں پر الیکشن لڑ رہی ہے۔ ہم ایسے مسائل اٹھا رہے ہیں جو عوام سے متعلق ہیں اور جن سے عوام پریشانی ہے۔‘‘

یوپی اسمبلی انتخابات کے پیش نظر کانگریس کی جنرل سکریٹری پرینکا گاندھی نے آج صاحب آباد میں رود شو کیا اور پارٹی کے لئے ووٹ مانگے۔ صاحب آباد سے سنگیتا تیاگی میدان میں ہیں جن کے شوہر اور کانگریس کے لیڈر راجیو تیاگی کا اگست 2020 میں حرکت قلب بند ہو جانے کے سبب انتقال ہو گیا تھا۔

پنجاب کے اسمبلی انتخابات کے لیے آج کانگریس کے اسٹار کیمپینروں کی فہرست جاری کی گئی ہے۔ اس فہرست میں کانگریس صدر سونیا گاندھی، سابق وزیر اعظم منموہن سنگھ، پارٹی کے سابق صدر راہل گاندھی اور جنرل سکریٹری پرینکا گاندھی کے نام شامل ہیں۔ اس کے علاوہ بھوپندر سنگھ ہڈا اور آنند شرما بھی پارٹی کے اسٹار کیمپینروں میں شامل ہیں۔

کانگریس کے اقلیتی شعبہ کے چیئرمین عمران پرتاپ گڑھی کو بھی پنجاب کے لئے پارٹی کے اہم مہم جوؤں میں شامل کیا گیا ہے۔ اس سے قبل گووا کی اسٹار کیمپینروں کی فہرست میں بھی عمران پرتاپ گڑھی کا نام شامل تھا۔

پنجاب کے وزیر اعلیٰ چرنجیت سنگھ چنی کے بھتیجے بھوپندر سنگھ ہنی کو ای ڈی کی جانب سے غیرقانونی ریت کی کانکنی کے معاملہ میں گرفتار کئے جانے پر پرینکا گاندھی نے کہا، ’’میں کہہ چکی ہوں کہ ایجنسیوں کا غلط استعمال کیا جا رہا ہے۔ حکومت انہں لوگوں کو دھمکانے اور حزب اختلاف کے لیڈران پر دباؤ بنانے کے لئے استعمال کر رہی ہے۔ انتخابات کے دوران یہ سب قبول نہیں کیا جا سکتا۔‘‘

کسانوں کے حکومت پر ایم ایس پی کے معاملہ پر وعدہ خلافی کا الزام عائد کئے جانے کے بعد آج مرکزی وزیر زراعت نریندر سنگھ تومر نے یقین دہانی کرائی کہ اس معاملہ پر انتخابات کے بعد کمیٹی کا اعلان کیا جائے گا۔ راجیہ سبھا میں اپنی تقریر کے دوران نریندر تومر نے کہا، ’’مرکزی حکومت پانچ ریاستوں میں ہونے جا رہے اسمبلی انتخابات کے بعد ایم ایس پی کے تعلق سے کمیٹی کا اعلان کرے گی۔‘‘

خیال رہے کہ گزشتہ روز ہی سنیوکت کسان مورچہ نے دہلی میں ایک پریس کانفرنس سے مرکزی حکومت کے خلاف محاذ کھولنے کا اعلان کیا تھا۔ پریس کانفرنس سے کہا گیا، ’’کسانوں کا حکومت کے ساتھ پانچ نکات پر اتفاق قائم ہوا تھا، جس پر حکومت نے خط بھی جاری کیا تھا۔ اسی کے بعد کسان تحریک ملتوی کی گئی تھی۔ بدقسمتی سے ایم ایس پی پر کمیٹی آج تک نہیں بنی، کسانوں کے اوپر درج مقدمات واپس ہونے کی بات پر کوئی کارروائی نہیں، پرالی پر جرمانے کا معاملہ بھی تھا، اور بجلی بل پر بھی کوئی کارروائی نہیں ہوئی۔‘‘

مرکزی وزارت صحت نے نیٹ پی جی امتحان کو 6 سے 8 ہفتوں کے لئے ملتوی کرنے کا اعلان کیا ہے۔ یہ امتحان 12 مارچ کو منعقد ہونے جا رہا تھا۔ وزارت صحت نے یہ فیصلہ ایم بی بی ایس کے طلبا کی طرف سے دائر اس عرضی پر سپریم کورٹ میں سماعت سے قبل لیا ہے، جس میں قومی اہلیت اور داخلہ ٹیسٹ (نیٹ پی جی) امتحان 2022 کو ملتوی کرنے کا مطالبہ کیا گیا ہے۔ یہ عرضی 4 فروری کو جسٹس ڈی وائی چندر چوڑ اور سوریہ کانت کی بنچ کے سامنے سماعت کے لیے درج کی گئی تھی۔

ہندوستان میں گزشتہ 24 گھنٹوں کے دوران کورونا کے سبب 1072 افراد کی جان چلی گئی، اسی کے ساتھ ملک بھر میں ہلاکتوں کی تعداد 5 لاکھ سے تجاوز کر گئی۔ تاہم کورونا کے یومیہ کیسز میں کمی درج کی گئی ہے۔

مرکزی وزارت صحت کے مطابق گزشتہ مقابلہ 13 فیصد کی کمی کے ساتھ ملک بھر سے آج ایک لاکھ 49 ہزار 394 نئے کیسز درج کئے گئے۔ اس دوران 2 لاکھ 46 ہزار 674 افراد نے شفایابی حاصل کر لی۔

ملک بھر میں فی الحال 14 لاکھ 35 ہزار 569 کورونا کیسز فعال ہیں۔ یومیہ پازیٹوٹی ریٹ 9.27 فیصد ہے۔ ملک بھر میں 168.47 کورونا ویکسین کی خوراکیں فراہم کی جا چکی ہیں۔