اہم خبریں: کووڈ سے موت کے معاملے میں پچاس ہزار کا معاوضہ کافی نہیں: چنی

پنجاب کے وزیراعلی چرنجیت سنگھ چنی نے کہاکہ کووڈ سے موت کی صورت میں اہل خانہ کو پچاس ہزار روپے کا معاوضہ کافی نہیں ہے۔ چنی نے اس سلسلہ میں کل وزیراعظم نریندر مودی کو خط لکھ کر کہا کہ معاوضہ چار لاکھ روپے ہونا چاہئے جیسا کہ وزارت داخلہ کی طرف سے مارچ 2020میں اعلان کیا گیا تھا۔

مرکز نے حال ہی میں سپریم کورٹ میں کہا ہے کہ کووڈ سے موت کے معاملہ میں پچاس ہزار روپے کا معاوضہ اسٹیٹ ڈیزاسٹر ریلیف فنڈ(ایس ڈی آر ایف) سے دیا جاسکتا ہے۔

دہلی کے وزیر اعلیٰ اروند کیجریوال نے کہا، ’’میں نے آج حکم دیا ہے کہ فضائی آلودگی کی وجہ سے تعمیراتی سرگرمیوں پر پابندی کے پیش نظر تعمیراتی مزدوروں کے بینک کھاتوں میں 5000 روپے جمع کرائے جائیں۔ ہم مزدوروں کو ان کی کم از کم اجرت کے مطابق ان کو ہونے والے نقصان کا ہرجانہ بھی فراہم کریں گے۔‘‘

دہلی ہائی کورٹ نے کانگریس کے سینئر لیڈر سلمان خورشید کی کتاب ’سن رائز اوور ایودھیا‘ پر پابندی عائد کرنے سے انکار کر دیا ہے۔ کتاب میں سلمان خورشید کی جانب سے ہندوتوا کے تعلق سے جو باتیں کہی گئی ہیں ان پر ایک طبقہ کو اعتراض ہے۔ دہلی ہائی کورٹ سے جس عرضی کو خارج کیا گیا ہے، اس میں سلمان خورشید کی کتاب کے سرکولیشن، خرید و فروخت اور پبلی کیشن پر پابندی عائد کرنے کا مطالبہ کیا گیا تھا۔

سپریم کورٹ نے مرکزی وزارت داخلہ کو ہدایت کی ہے کہ تریپورہ میں آزادانہ اور منصفانہ بلدیہ انتخابات کو یقینی بنانے کے لیے مرکزی مسلح پولیس فورسز کی دو اضافی کمپنیاں تعینات کی جائیں۔

سپریم کورٹ نے مرکز اور تریپورہ حکومت کو یہ ہدایت دی کہ بیلٹ اور ووٹوں کی گنتی کی حفاظت کو یقینی بنانے کے لیے ضروری انتظامات کو یقینی بنائیں۔

مرکزی وزارت صحت کے مطابق ہندوستان میں گزشتہ 24 گھنٹوں کے دوران کورونا وائرس کے 9119 معاملے رپورٹ ہوئے۔ اس دوران 396 افراد کی جان چلی گئی جبکہ 10264 مریضوں نے شفایابی حاصل کر لی۔ ملک بھر میں اب صرف ایک لاکھ 9 ہزار 940 کیسز فعال رہے گئے ہیں، یہ تعداد گزشتہ 539 دنوں میں سب سے کم ہے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔