اہم خبریں LIVE: ہریانہ میں راون دَہن کے دوران جلتا ہوا پتلہ لوگوں کے اوپر گرا، کچھ افراد زخمی

ہریانہ کے یمنا نگر میں راون دَہن کے دوران جلتا ہوا راون کا پتلہ وہاں موجود لوگوں کے اوپر گر گیا۔ اس حادثہ میں کچھ افراد کے زخمی ہونے کی اطلاع ہے۔ انھیں فوری طور پر قریبی اسپتال میں داخل کرایا گیا ہے۔

ممبئی کے ایچ این ریلائنس اسپتال میں آج دھمکی بھرا کال ریسیور کیا گیا۔ ڈی سی پی نیلوتپل نے بتایا کہ فون کرنے والے نے اسپتال میں دھماکہ کرنے کی دھمکی دی۔ اس نے امبانی فیملی کے کچھ اراکین کو جان سے مارنے کی بھی دھمکی دی ہے۔ اس معاملے میں ایف آئی آر درج کر کے جانچ شروع کر دی گئی ہے۔ اسپتال اور انٹیلیا کی سیکورٹی بھی بڑھا دی گئی ہے۔ جلد ہی ملزم کو گرفتار کر لیا جائے گا۔

تلنگانہ راشٹر سمیتی کے ایک اجلاس کے دوران پارٹی کا نام تبدیل کیا گیا ہے۔ حیدرآباد کے تلنگانہ بھون میں منعقد اجلاس کے دوران متفقہ طور پر ’تلنگانہ راشٹر سمیتی‘ (ٹی آر ایس) کا نام ’بھارت راشٹر سمیتی‘ (بی آر ایس) کرنے کا فیصلہ کیا گیا۔

انڈین آرمی کا کہنا ہے کہ ایک چیتا ہیلی کاپٹر اروناچل پردیش کے توانگ علاقہ میں حادثہ کا شکار ہو گیا۔ اس حادثہ میں ایک پائلٹ کی جان چلی گئی۔ آرمی کے مطابق دونوں پائلٹوں کو علاج کے لئے نزدیکی اسپتال پہنچایا گیا تھا، جہاں ایک پائلٹ لیفٹیننٹ سوربھ یادو کی جان چلی گئی۔

وزیر اعظم نریندر مودی اس وقت ہماچل پردیش کے دورے پر ہیں۔ جہاں انہوں نے 1470 کروڑ کی لاگ سے تیار ایمس بلاس پور کا افتتاح کیا ہے۔ اس موقع پر وزیر اعلیٰ جے رام ٹھاکر، مرکزی وزیر انوراگ ٹھاکر اور بی جے پی کے سربراہ جے پی نڈا بھی موجود تھے۔

آر ایس ایس سربراہ موہن بھاگوت نے کہا ’’روزگار مطلب نوکری اور نوکری کے پیچھے ہی بھاگیں گے اور وی بھی سرکاری! اگر ایسے سبھی لوگ دوڑیں گے تو کتنی ملازمتیں دی جا سکتی ہیں؟ کسی بھی سماج میں سرکاری اور پرائیویٹ ملا کر زیادہ سے زیادہ 10، 20 30 فیصد نوکری ہوتی ہیں۔ باقی سب کو اپنا کام کرنا پڑتا ہے۔‘‘

کانگریس لیڈر راہل گاندھی نے ملک کے باشندگان کو دسہرہ یعنی وجے دشمی کی مبارک باد پیش کی ہے۔ انہوں نے ٹوئٹر پر لکھا، ’’نفرت کی لنکا جلے، ہنسا (تشدد) کا میگھناد مٹے۔ اہنکار (تکبر) کے راون کا خاتمہ ہو، ستیہ (سچائی) کی استیہ (جھوٹ) پر وجے (جیت) ہو۔ تمام ہموطنوں کو وجے دشمی کی دلی مبارک باد۔‘‘

مرکزی وزارت صحت کے مطابق ہندوستان میں گزشتہ 24 گھنٹوں کے دوران کورونا کے 2468 کیسز کی تصدیق کی گئی ہے۔ ملک بھر میں اب کورونا کے فعال کیسز کی تعداد 33318 ہو گئی ہے۔

اتراکھنڈ کے پوڑی ضلع میں باراتیوں سے بھری ایک بس کے گہری کھائی میں گر جانے سے دلخراش حادثہ پیش آیا۔ اس حادثہ میں اب تک 25 افرد ہلاک ہوئے ہیں جبکہ متعدد لاپتہ ہیں۔ پولیس اور ایس ڈی آر ایف نے راتوں رات آپریشن چلا کر 21 افراد کو زندہ نکال لیا۔ کئی افراد شدید طور پر زخمی ہوئے ہیں جنہیں علاج کے لئے نزدیکی اسپتالوں میں داخل کیا گیا ہے۔

مہاراشٹر میں کئی گاڑیوں اور ایک امبولنس کے درمیان ہونے والے تصادم کے نتیجہ میں 5 افراد کی جان چلی گئی ہے۔ علی صبح ممبئی کے باندرا-ورلی سی لنک پر پیش آنے والے اس حادثہ متعدد افراد زخمی بھی ہوئے ہیں، جو زیر علاج ہیں۔

کشمیر کے شوپیاں میں سیکورٹی فورسز سے تصادم میں 3 مقامی ملی ٹینٹ ہلاک ہو گئے۔ پولیس کے مطابق ہلاک ہونے والے ملی ٹینٹ جیش محمد سے وابستہ تھے۔ اے ڈی جی پی کشمیر وجے کمار نے بتایا ’’ہلاک ہونے والے ملی ٹینٹ حنان بن یعقوب اور جمشید پلوامہ میں ایس پی او جاوید احمد ڈار اور ایک بنگالی مزدور کے قتل کی واردات میں ملوث تھے۔‘‘

کورونا وائرس کے پھیلاؤ میں کمی کے پیش نظر ڈی ڈی ایم اے (ڈہلی ڈیزاسٹر منیجمنٹ اتھارٹی) نے فیصلہ کیا ہے کہ اب قومی راجدھانی میں کھلے مقامات پر ماسک نہ پہننے پر 500 روپے کا جرمانہ وصول نہیں کیا جائے گا۔ یہ فیصلہ یکم اکتوبر سے نافذ العمل قرا دیا گیا ہے۔