اہم خبریں LIVE: اگر کوئی سی بی آئی کے ذریعے الیکشن جیتنا چاہتا ہے تو یہ ممکن نہیں، کانگریس

سی بی آئی نے آج جھارکھنڈ کے سابق وزیر کھیل اور کانگریس لیڈر بدھو ٹرکی کے رانچی میں واقع ٹھکانوں پر چھاپہ مارا۔ جھارکھنڈ کانگریس کے صدر راجیش ٹھاکر نے کہا ’’سی بی آئی کے اس طرح کے چھاپوں کے پیچھے ایجنڈا واضح ہے۔ گزشتہ 6 سال سے سی بی آئی کہاں تھی؟ اگر کوئی سی بی آئی کے ذریعے الیکشن جیتنا چاہتا ہے تو یہ ممکن نہیں ہے۔ یہ فیصلہ عوام کریں گے۔ کل پولنگ کی اطلاع دی گئی اور آج چھاپے مار دئے گئے۔‘‘

دہلی کے نو تقرر شدہ لیفٹیننٹ گورنر ونے کمار سکسینہ نے آج عہدے اور رازداری کا حلف اٹھا لیا۔ ونے کمار دہلی کے 22ویں ایل جی ہیں۔ اس سے قبل وہ کھادی اور گرام ادیوگ کمیشن (کے وی آئی سی) کے چیئرپرسن کے طور پر خدمات انجام دے چکے ہیں اور وہ انیل بیجل کی جگہ لے رہے ہیں۔

آر ایل ڈی کے سربراہ جینت چودھری راجیہ سبھا انتخابات کے لیے سماج وادی پارٹی اور راشٹریہ لوک دل کے مشترکہ امیدوار ہوں گے۔ سماجوادی پارٹی کی جانب سے اس کا اعلان کیا گیا۔

انفورسمنٹ ڈائریکٹوریٹ (ای ڈی) نے جمعرات کو علی الصبح شیوسینا لیڈر اور وزیر ٹرانسپورٹ انیل ڈی پرب کی رہائش اور دفاتر پر چھاپہ مارا۔ ای ڈی کی ٹیموں نے پرب کے سرکاری بنگلے سمیت ممبئی، رتناگیری اور پونے میں واقعہ نصف درجن سے زیادہ ٹھکانوں پر پہنچ کر تلاشی لی۔