اہم خبریں: مغربی بنگال میں 30 مئی تک لاک ڈاؤن کا اعلان

کورونا وائرس کی بے قابو صورت حال کے پیش نظر مغربی بنگال میں بھی لاک ڈاؤں کا اعلان کر دیا گیا ہے۔ چیف سکریٹری الپن بندوپادھیائے نے اس کے احکامات جاری کئے۔ ان کے مطابق 16 مئی سے 30 مئی تک بنگال میں لاک ڈاؤن رہے گا۔ اس دوران صرف ضروری خدمات ہی مستثنیٰ رہیں گی۔

دہلی کے وزیر اعلیٰ اروند کیجروال نے ہفتہ کے روز اعلان کیا کہ ریاستی حکومت کی جانب سے آج سے آکسیجن کنسنٹریٹر بینک کی شروعات کی جا رہی ہے۔ انہوں نے کہا کہ یہ سہولیت کورونا کے مریضوں کے لئے شروع کی جا رہی ہے تاکہ انہیں بروقت آکسیجن حاصل ہو سکے۔ انہوں نے کہا کہ ایسے 200 بینک دہلی کے ہر ضلع میں قائم کئے جائیں گے اور ضرورت پڑنے پر ہماری ٹیم ہوم آئسولیشن میں رہ رہے مریضوں کو ان کے گھر کے دروازے تک آکسیجن کنسنٹریٹر کی راہمی کرے گی۔

کورونا وائرس کی بے قابو صورت حال اور ٹیکہ کاری کے حوالہ سے تبادلہ خیال کے لئے وزیر اعظم نریندر مودی نے آج ایک اعلیٰ سطحی اجلاس طلب کر لیا ہے۔

مرکزی وزارت صحت کے مطابق ہندوستان میں گزشتہ 24 گھنٹوں کے دوران 326098 نئے مریضوں کی تصدیق کی گئی جبکہ 353299 مریضوں نے شفایابی حاصل کر لی۔ اس دوران 3890 افراد کی جان چلی گئی۔

گزشتہ سال کورونا کی وبا شروع ہونے کے بعد مرکزی حکومت کی طرف سے پی ایم کیئرس فنڈ کی شرعات کی گئی تھی اور عوام سے دل کھول کر امداد کی اپیل کی گئی تھی۔ حزب اختلاف کی جانب سے پی ایم کیئرس بارہا سوال اٹھائے گئے ہیں اور اب اس کے خلاف سپریم کورٹ میں بھی عرضی داخل کر دی گئی ہے۔

عرضی میں مطالبہ کیا گیا ہے کہ پی ایم کیئرس فنڈ کا استعمال کورونا ویکسین، آکسیجن پلانٹ قائم کرنے اور دوسرے ضروری آلات خریدنے میں کیا جانا چاہیئے۔