اہم خبریں: دہلی، این سی آر میں پھر زلزلہ کے جھٹکے

قومی راجدھانی دہلی اور این سی آر میں ایک مرتبہ پھر زلزلہ کے جھٹکے محسوس کئے گئے ہیں۔ جمعہ کی شام کو آنے والے زلزلہ کی شدت ریکٹر اسکیل پر 4.5 بتائی جا رہی ہے۔ گزشتہ کچھ وقت سے دہلی، این سی آر سمیت ملک کے کئی علاقوں میں لگاتار زلزلہ کے جھٹکے محسوس کئے جا رہے ہیں۔ سینٹر فار سیسمولاجی نے بتایا ہے کہ گڑگاؤں ہریانہ کے جنوب مغرب سے 63 کلومیٹر دور 4.5 کی شدت کا زلزلہ محسوس کیا گیا ہے۔ ادھر میزورم کے چمفئی میں بھی جمعہ کی دوپہر کو زلزلہ کے جھٹکے محسوس کئے گئے ہیں۔

گزشتہ دنوں ایل این جے پی اسپتال کے ڈاکٹر اسیم گپتا کی کورونا انفیکشن کی وجہ سے موت ہو گئی تھی۔ آج دہلی کے وزیر اعلیٰ اروند کیجریوال نے ان کے اہل خانہ سے ملاقات کی۔ اس موقع پر وزیر اعلیٰ نے ان کی فیملی کو 1 کروڑ روپے کے معاوضے کی رقم بھی دی۔

ممبئی میں جمعہ کے روز زبردست بارش کا نظارہ دیکھنے کو مل رہا ہے۔ موسلادھار بارش کی وجہ سے کئی مقامات پر سڑکیں ڈوب گئی ہیں جس کی وجہ سے لوگوں کو آمد و رفت میں پریشانی کا سامنا کرنا پڑ رہا ہے۔ آبی جماؤ کا نظارہ بھی جگہ جگہ دیکھنے کو مل رہا ہے۔

ایل اے سی پر کشیدگی کے درمیان پی ایم مودی آج صبح لداخ پہنچ گئے۔ پی ایم مودی کا یہ اچانک دورہ تھا اور ان کے ساتھ چیف آف ڈیفنس اسٹاف (سی ڈی ایس) بپن راوت اور آرمی چیف ایم ایم نرونے بھی موجود تھے۔ لیہہ کے نیمو پوسٹ پر پی ایم مودی کو فوج اور بحریہ کے افسران نے زمینی حقیقت کی جانکاری دی۔ واضح رہے کہ مئی مہینے سے ہی چین کے ساتھ سرحد پر کشیدگی کی صورت حال بنی ہوئی ہے اور کئی جوان اس درمیان شہید بھی ہو چکے ہیں۔

ہندوستان میں ایک بار پھر کورونا انفیکشن نے ریکارڈ قائم کیا ہے۔ جاری کردہ تازہ ترین اعداد و شمار کے مطابق گزشتہ 24 گھنٹے میں 20903 نئے کیس درج کیے گئے ہیں جو کہ ایک دن میں اب تک سب سے زیادہ ہے۔ علاوہ ازیں پچھلے 24 گھنٹے میں 379 لوگوں کی موت بھی ہوئی ہے۔ اس طرح سے دیکھا جائے تو ہندوستان میں مجموعی طور پر مریضوں کی تعداد 625544 ہو گئی ہے اور مہلوکین کی تعداد 18213 پہنچ گئی ہے۔