گجرات: معاشی تنگی سے پریشان خاتون نے 5 بچوں سمیت کنویں میں لگائی چھلانگ، 4 ہلاک

بھاو نگر: گجرات میں ضلع بھاو نگر کے النگ تھانہ کے پانچ پیپلا گاؤں میں ایک خاتون نےاپنے پانچ بچوں کے ساتھ کنویں میں چھلانگ لگا دی جس سے چار بچوں کی موت ہوگئی۔

پولیس سب انسپکٹر سی یاچ مکوانا نے آج بتایا کہ کھیت میں مزدور کے طورپر کام کرنے والی گیتا بین(45)جائےوقوع سے 30کلومیٹر دور جھاجھ میر گاؤں کی رہنے والی تھی۔اس کاشوہر بھی کھیت میں مزدور ی کرتاہے۔ کل اپنے شوہر سے مائیکےاور مندر درشن کرنے کی بات کہہ کر پانچوں بچوں کے ساتھ گھر سے نکلی تھی۔

اس نے شام کو تقریباً 6 بجے پہلے اپنے بچوں کوکنویں میں پھینک دیا اور بعد میں خود بھی چھلانگ لگادی۔اسے اور اس کی بڑی بیٹی دھرمشٹھا (8)کو بچالیا گیا جبکہ ایک بیٹی اکشیتا(7)اور تین بیٹوں کلدیپ(5)،کارتک(3)اور ردر(ڈھیڑھ سال)کی کنویں میں ڈوب کر موت ہوگئی۔

خاتون کا کہنا ہے کہ وہ معاشی تنگی سے پریشان تھی اور اسے بھوت پریت نظر آتے تھے۔اس لئے وہ اپنے بچوں کے ساتھ خودکشی کرنا چاہتی تھی۔پولس پورے معاملے کی تفتیش کررہی ہے۔