آتش بازی میں جان سے ہاتھ دھو بیٹھا نوجوان... پٹاخے پر رکھا گلاس، دھماکے کے بعد جسم میں گھس گئے ٹکڑے

 نوئیڈا کے سیکٹر 63 میں دیوالی کے موقع پر پٹاخہ پھوڑتے وقت اسٹیل کا گلاس پھٹنے سے 20 سالہ نوجوان شیوا کی موت ہو گئی۔ دھماکے میں گلاس کے ٹکڑے اس کے جسم میں گھس گئے تھے جس سے سنگین زخم آئے اور بہت زیادہ خون بھی بہہ گیا تھا۔ پولیس نے لاش کو پوسٹ مارٹم کے لیے بھیج کر تفتیش شروع کر دی ہے۔

یہ واقعہ نوئیڈا کے سیکٹر 63 کی چھجراسی کالونی میں پیش آیا۔ پولیس نے بتایا کہ متوفی 20 سالہ شیوا ولد ونود ساکن بلال مسجد والی گلی، چھجراسی کالونی کا رہائشی تھا۔ رپورٹ کے مطابق، متوفی شیوا نے پٹاخہ پھوڑنے سے پہلے اس کے اوپر ایک اسٹیل کا گلاس رکھ دیا تھا، جو ایک زور دار دھماکے کے ساتھ پھٹ گیا اور اس کے ٹکڑے اس کے جسم میں گھس گئے۔ شدید زخموں کی وجہ سے نوجوان کی حالت بگڑ گئی۔ اس کے اہل خانہ فوری طور پر اسے اسپتال لے گئے لیکن علاج کے دوران اس کی موت ہو گئی۔

تھانہ سیکٹر 63 پولیس نے لاش کو تحویل میں لے کر پوسٹ مارٹم کے لیے بھیج دیا ہے۔ پولیس کا کہنا ہے کہ معاملے میں مزید قانونی کارروائی کی جا رہی ہے۔ غور طلب ہے کہ دیوالی کے موقع پر دہلی-این سی آرسمیت ملک کے مختلف حصوں میں کئی واقعات پیش آئے جہاں جشن کی خوشیاں اچانک ماتم میں بدل گئیں۔ آتش بازی کی وجہ سے کئی بچوں کی آنکھوں کی روشنی چلی گئی تو کئی لوگ آگ سے جھلس گئے۔