غیر قانونی تعمیر گرانے گئی خاتون افسر کا قتل، سپریم کورٹ نے نوٹس لیا 

ہماچل پردیش کے کسولی میں منگل کے روز ایک گیسٹ ہاؤس کے مالک نے خاتون اسسٹنٹ ٹاؤن پلانر شیل بالا شرما کا گولی مار کر قتل کر دیا۔ 51 سالہ شیل بالا سپریم کورٹ کی ہدایات کے مطابق علاقہ میں غیر قانونی تعمیرات کو گروانے گئی تھیں۔ کارروائی سے بوکھلائے ملزم نے ان پر گولیاں چلانی شروع کر دیں۔ خاتون افسر اور ان کے معاونین جب وہاں سے بھاگے تو ملزم نے ان کا پیچھا کر کے شیل بالا کا گولی مار کر قتل کر دیا۔

واضح رہے کہ سپریم کورٹ نے کسولی واقع 13 ہوٹلوں میں کی گئیں غیر قانونی تعمیرات کو منہدم کرنے کی ہدایت دی تھی۔ ملزم کا ہوٹل دھرم شالا-کسولی روڈ پر منڈودھر میں واقع ہے۔ پولس اور چشم دیدوں کے مطابق شیل بالا کا قتل نارائنی گیسٹ ہاؤس کے مالک وجے ٹھاکر نے کیا ہے۔ شیل جب ملزم کے ہوٹل میں داخل ہوئیں تو ملزم نے ان پر کم از کم تین گولیاں چلائیں، یہ واردات دوپہر تقریباً ڈھائی بجے ہوئی۔

موقع واردات پر متعدد پولس افسران اور سرکاری افسران موجود تھے۔ گولیاں لگنے کے بعد شیل کو دھرم پور سرکاری اسپتال لایا گیا جہاں ڈاکٹروں نے انہیں مردہ قرار دے دیا۔ پولس کا کہنا ہے کہ وجے ٹھاکر کو گرفتار کرنے کے لئے کئی ٹیمیں تشکیل دیں گئی ہیں۔ علاوہ ازیں ملزم کی اطلاع دینے والے کو ایک لاکھ کا انعام دینے کا بھی اعلان کیا گیا ہے۔

فائرنگ میں پی ڈبلیو ڈی کا ایک ملازم گلاب سنگھ بھی زخمی ہوا ، اس کا علاج چنڈی گڑھ میں چل رہا ہے۔ واردات کے بعد علاقہ میں غیر قانونی تعمیرات گرانے کا کام فی الحال بند کر دیا گیا ہے۔ واقعہ کے بعد شام کو ڈی جی پی بھی موقع پر پہنچے ۔

واقعہ کے ایک چشم دید افسر شیویندر پال سنگھ نے بتایا کہ جب شیل بالا اور دیگر افسران ہوٹل میں داخل ہوئے تو ملزم وجے ٹھاکر نے ان پر فائرنگ شروع کر دی۔ انہوں نے بتایا ’’اس نے ہوٹل کے اندر دو گولیاں چلائیں، ایک پی ڈبلیو ڈی کے ملازم کو لگی، اس کے بعد اس نے ہمارا پیچھا کیا اور فائر کردیا جو اسٹنٹ ٹاؤن پلانر شیل بالا کو لگی، وہ وہیں گر پڑیں۔‘‘

پولس کے مطابق، ملزم ٹھاکر کو 2011 میں ہتھیار کا لائسنس ملا تھا۔ اس کے پاس ایک ریوالور ہے۔ واضح رہے کہ شیل بالا منڈی کی رہائشی تھیں ۔ ان کی شادی نیشنل ریسرچ سنٹر فار مشروم کے ڈائریکٹر ڈاکٹر بی پی شرما سے ہوئی تھی۔ دونوں کا ایک 24 سالہ بیٹا ہے جس نے حال ہی میں شملہ واقع اندرا گاندھی میڈکل کالج سے ایم بی بی ایس کی تعلیم مکمل کی ہے۔