سرمائی اجلاس: حکومت ایوان کو اعتماد میں لے کر کام کرے تو بہتر ہوگا:، مایاوتی

لکھنؤ: نئے زرعی قوانین کی واپسی کے بعد پیر سے شروع ہو رہے پارلیمنٹ کے سرمائی اجلاس کے سلسلے میں بی ایس پی سپریمو مایاوتی نے توقع کا اظہار کیا ہے کہ حکومت یوم آئین پر عوام سے کئے گئے وعدوں کو نہیں بھولے گی اور کسانوں کے سبھی مسائل پر غور کرے گی۔

مایاوتی نے اتوار کو ٹوئٹ کیا کہ پارلیمنٹ کا سرمائی اجلاس کل سے شروع ہو رہا ہے۔ اس دوران تین دن قبل یوم آئین پر عوام سے کئے گئے اپنے وعدوں کو حکومت نہیں بھولے گی بلکہ انہیں صحیح ڈھنگ سے نبھائے گی بھی۔ یہی ملک کو توقع ہے۔ کسانوں کے سبھی مسائل پر حکومت کا رخ کیا ہوتا ہے۔ اس پر بھی سب کی نظر رہے گی'۔

انہوں نے کہا کہ بی ایس پی کے سبھی اراکین پارلیمنٹ کو بھی ہدایت دی گئی ہے کہ وہ ملک و مفاد عامہ کے اہم مسائل کو وصول کے مطابق پوری تیاری کے ساتھ دونوں ایوانوں میں ضرور اٹھائیں۔ حکومت بھی اپنی جانب سے ایوان کو پورے اعتماد میں لے کر ہی کام کرے تو یہ بہتر ہوگا۔

بی ایس پی سربراہ مایاوتی نے کہا کہ زرعی قوانین جیسے مفاد عامہ کے مسائل پر قانون بناتے وقت اس سے پڑنے والے اثرات پر غور نہ کرنا ایک اہم سوال بن گیا ہے جس کی جانب عدلیہ بار بار اشارہ کر رہی ہے۔ اس پر بھی مرکز کو ضرور دھیان دینا چاہئے تاکہ نئے قوانین کے سلسلے میں ملک کو آگے غیر ضروری ٹکراؤ سے بچایا جاسکے۔