شوہر کے انتقال کے بعد اہلیہ نے الیکشن کمیشن کے افسران کے خلاف درج کرائی شکایت

کھڑدہا اسمبلی حلقہ سے ترنمول کانگریس کے امیدوار کاجل سنہا کی اہلیہ نندیتا سنہا نے ڈپٹی الیکشن کمشنر سدیپ جین اور کمیشن کے دیگر افسران کے خلاف شکایت درج کرائی ہے۔ نندیتا کا الزام ہے کہ ان افسران نے وبا کے دوران امیدواروں اور عوام کی حفاظت کو یقینی بنانے کے لئے کچھ نہیں کیا۔

واضح رہے 25 اپریل یعنی اتوار کو ترنمول کانگریس کے امیدوار کاجل سنہا کا انتقال ہو گیا تھا اور وہ دو روز قبل ہی کورونا سے متاثر ہوئے تھے۔ ترنمول کانگریس کی سربراہ اور مغربی بنگال کی وزیر اعلی ممتا بنرجی نے کاجل سنہا کے انتقال پر افسوس جتاتے ہوئے حیرانی کا اظہار کیا تھا۔

ممتا بنرجی نے ٹوئٹ کر کے لکھا تھا کہ ’’بہت افسوس، حیران، کھڑدہا سے ہماری پارٹی کے امیدوار کاجل سنہا کا کووڈ کی وجہ سےانتقال ہو گیا۔ انہوں نے لوگوں کی خدمت کے لئےاپنی زندگی وقف کی تھی۔ وہ ترنمول کانگریس کے لمبے وقت سے رکن تھے۔ ہمیں ان کی یاد آئے گی، ان کے خاندان اور ان کے مداحوں کے تئیں میری خراج عقیدت۔‘‘ واضح رہے 24 پرگنہ ضلع کی کھڑدہا سیٹ پر 22 اپریل کو ووٹنگ ہوئی تھی۔

اس سے پہلے اس مہینے ریوولیوشنری سوشلسٹ پارٹی (آر ایس پی) کے جانگی پور سیٹ سے امیدوار پردیپ کمار نندی اور سمسیر گنج سے کانگریس کے امیدوار ریاض الحق کی بھی اس وبائی مرض کی وجہ سے موت ہو گئی تھی۔