دہلی-این سی آر میں شدید گرمی اور چلچلاتی دھوپ، کئی ریاستوں میں بارش سے تبدیل ہوگا موسم

نئی دہلی: اپریل کے مہینے میں ہی موسم کا رویہ بدلا ہوا نظر آتا ہے۔ بڑھتے ہوئے درجہ حرارت اور چلچلاتی دھوپ نے عوام کی مشکلات میں اضافہ کر دیا ہے۔ اپریل کے ابتدائی دنوں میں ہی گرمی کی وجہ سے لوگوں کا برا حال ہے۔ وسطی ہندوستان کے کچھ حصوں میں درجہ حرارت 40 سے تجاوز کر گیا ہے۔ اس کے ساتھ ہی شمال مشرقی ریاستوں میں ہلکی بارش کی صورتحال ہے۔

اس سال موسم میں بڑی تبدیلی آ رہی ہے۔ ایک طرف جہاں بے موسمی بارش نے عوام کی مشکلات میں اضافہ کیا وہیں دوسری جانب اب اپریل میں ہی مئی جون جیسی دھوپ نے لوگوں کا باہر نکلنا مشکل کر دیا ہے۔ محکمہ موسمیات (آئی ایم ڈی) کے مطابق آئندہ 4 سے 5 روز میں ملک کے بیشتر علاقوں میں زیادہ سے زیادہ درجہ حرارت میں 4 سے 5 ڈگری تک اضافہ ہو سکتا ہے۔

اس ہفتے کے آخر تک دہلی-این سی آر سمیت کئی حصوں میں پارہ بڑھنے کی امید ہے۔ اس کے ساتھ ہی شمال مشرقی ریاستوں میں بارش کا سلسلہ جاری ہے۔ بدھ (12 اپریل) کو مغربی ہندوستان کے کئی حصوں میں ہلکی بارش دیکھی جا سکتی ہے۔ گجرات اور مہاراشٹر کے کچھ علاقوں میں اگلے 5 دنوں تک بارش کا امکان ہے۔ محکمہ موسمیات کے مطابق بدھ کو راجستھان کے مغربی حصوں میں گردو غبار کے طوفان اور گرج چمک کے ساتھ بارش ہو سکتی ہے۔ کیرالہ میں بھی بعض مقامات پر ہلکی بارش اور بعض حصوں میں درمیانی بارش کی پیش گوئی کی گئی ہے۔

اروناچل پردیش اور سکم کے ساتھ ساتھ تمل ناڈو، ساحلی کرناٹک اور لکشدیپ میں بھی ایک یا دو مقامات پر ہلکی بارش ہو سکتی ہے۔ دیو بھومی میں بھی بارش اور برفباری کا سلسلہ جاری ہے لیکن محکمہ موسمیات نے 14 اپریل کے بعد درجہ حرارت میں اضافے کا امکان ظاہر کیا ہے۔ آئی ایم ڈی کے مطابق اتراکھنڈ کا پارہ تیزی سے بڑھے گا اور لوگوں کو شدید گرمی کا سامنا کرنا پڑ سکتا ہے۔ دوسری جانب محکمہ موسمیات کے مطابق اس سال معمول سے زیادہ بارشیں ریکارڈ کی جا سکتی ہیں جس سے فصلوں پر برے اثرات مرتب ہو سکتے ہیں۔