موسم کا حال: دہلی-این سی آر میں دھول بھری آندھی، ہر طرف دھند کا عالم، آلودگی میں اضافہ

نئی دہلی: ملک کی راجدھانی نئی دہلی اور آس پاس کے علاقوں میں آج یعنی منگل کی صبح کی شروعات دھول بھری آندھی کے ساتھ ہوئی۔ چنانچہ پورا دہلی شہر اور این سی آر کے کئی علاقے دھول کی لپیٹ میں آگئے اور حد نگاہ بھی کم ہو گئی۔ آئی جی آئی ایئرپورٹ کے علاقے میں بھی دھول بھری آندھی کے بعد حد نگاہ میں کمی واقع ہوئی۔ اس علاقے میں حد نگاہ کم ہو کر 1100 میٹر سے کم گئی۔

محکمہ موسمیات کے مطابق دہلی اور آس پاس کے علاقوں میں دھول بھری آندھی راجستھان پر طوفانی گردش کی وجہ سے آئی ہے۔ طوفانی گردش کی وجہ سے شمالی راجستھان میں دھول بھری آندھی اور ہلکی بارش کی سرگرمیاں ہو رہی ہیں۔ اس سرگرمی کا اثر راجستھان، دہلی، ہریانہ اور پنجاب کے کچھ حصوں میں اگلے 3-4 دنوں تک مرحلہ وار دیکھا جائے گا۔

خیال رہے کہ کہ دہلی-این سی آر میں دھول بھری آندھی کی وجہ سے آلودگی کی سطح میں بھی اضافہ درج کیا جا رہا ہے۔ انڈیا گیٹ، پٹپڑ گنج اور پوسا کے علاقوں میں اے کیو آئی سب سے خراب ریکارڈ کیا گیا۔ صبح 7 بجے پوسا کے علاقے میں اے کیو آئی 999 درج کیا گیا۔ وہیں، میجر دھیان چند نیشنل اسٹیڈیم کے علاقے میں بھی اے کیو آئی 999 ریکارڈ کیا گیا۔ آر کے پورم کے علاقے میں اے کیو آئی 872 آنند وہار علاقے میں 829 ریکارڈ کیا گیا۔ محکمہ موسمیات کے مطابق دہلی میں آج ایک یا دو مقامات پر بارش دیکھی جا سکتی ہے۔

دھول کا طوفان شروع ہونے کے ساتھ ہی دہلی اور آس پاس کے علاقوں کے موسم میں تبدیلی آئے گی۔ محکمہ موسمیات کے مطابق آج یعنی 16 مئی کو کم سے کم درجہ حرارت 27 اور زیادہ سے زیادہ 40 ڈگری تک ریکارڈ کیا جا سکتا ہے۔ اس کے ساتھ ہی آج نئی دہلی میں بارش کی سرگرمیاں دیکھنے کو ملیں گی۔ محکمہ موسمیات کے مطابق کل بھی دہلی میں تیز ہوائیں چل سکتی ہیں۔ اس کے ساتھ ہی 18 مئی کو نئی دہلی میں ایک بار پھر بارش کی سرگرمیاں دیکھی جا سکتی ہیں۔