ہمیں فکر ہے اور ہم شکست کی وجوہات جاننے کی کوشش کر رہے ہیں: سچن پائلٹ

راجستھان کے نائب وزیر اعلی سچن پائلٹ نے شکست کی ذمہ داری قبول کرلی ہے اور مستقبل کی تیاری شروع کر دی ہے۔

تصویر سوشل میڈیا
تصویر سوشل میڈیا
user

قومی آوازبیورو

راجستھان پردیش کانگریس کے صدر اور نائب وزیر اعلی سچن پائلٹ نے حال ہی میں اختتام پزیر ہوئے لوک سبھا انتخابات میں کانگریس کی ہوئی شکست کی ذمہ داری قبول کرتے ہوئے کہا ہے کہ کانگریس بوتھ لیول پر سروے کرا رہی ہے اور شکست کی وجہ جاننے کی کوشش کر رہی ہے۔ کل جے پور میں کانگریس کے دفتر میں پائلٹ نے کہا ’’لوک سبھا انتخابات میں کہاں غلطی ہوئی اس کے لئے ہم نے ہر بوتھ سے رپورٹ مانگی ہے اور راجستھان میں لگ بھگ پچاس ہزار بوتھ ہیں‘‘۔

سچن پائلٹ نے اپنی خامیوں کا اعتراف کرتے ہوئے کہا ’’نتائج ہماری امید کے مطابق نہیں آئے اور یہ فکر کی بات ہے اسی لئے تمام پہلوؤں پر غور کرنے کی ضرورت ہے۔ انہوں نے بتایا کہ حال ہی میں اسمبلی کی دو سیٹوں پر ضمنی انتخابات ہونے ہیں۔ واضح رہے ناگور اور مانڈوا میں ضمنی انتخابات ہونے ہیں کیونکہ یہاں کے ارکان اسمبلی ہنومان بینی وال اور نریندر کمار لوک سبھا کے لئے منتخب ہو گئے ہیں۔ پائلٹ نے کہا کہ ہماری پہلی ترجیح ان سیٹوں کو جیتنا ہے۔


ذرائع ابلاغ میں راجستھان کے وزیر اعلی اشوک گہلوت کے حوالہ سے خبر شائع ہوئی تھی کہ انہوں نے اپنے بیٹے کی ہار کے لئے سچن پائلٹ کو ذمہ دار ٹھہرایا ہے۔ سچن پائلٹ نے اس پر اپنی صفائی دی ہے۔ واضح رہے اشوک گہلوت نے بھی ٹوئٹ کر کے بیان جاری کیا ہے کہ ان کے بیان کو میڈیا نے غلط طریقہ سے پیش کیا ہے۔ لوک سبھا انتخابات میں کانگریس اپنی شکست کے تمام پہلوؤں پر غور کر رہی ہے اور اس کوشش میں ہے کہ ٹھوس رپورٹ کے بعد ہی کسی نتیجہ پر پہنچا جائے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔