ووٹ چور، گدی چھوڑ: ’ہم ہر گھر، ہر بوتھ تک جائیں گے‘، رام لیلا میدان کی ریلی کے لیے کانگریس کی تیاریاں تیز

’ووٹ چوری‘ کے خلاف راہل گاندھی کی قیادت میں کانگریس کی مہم دن بہ دن تیز ہوتی جا رہی ہے۔ مرکزی حکومت اور الیکشن کمیشن کو راہل گاندھی پہلے ہی ووٹ چوری کے لیے لگاتار نشانہ بنا رہے ہیں، لیکن اب اس مہم کو تیزی دیتے ہوئے 14 دسمبر کو رام لیلا میدان میں عظیم الشان ریلی ہونے والی ہے۔ اس کے لیے کانگریس کی تیاریاں بھی تیز ہو گئی ہیں۔ مختلف ریاستوں کے کانگریس صدور نے عوام سے اپیل کرنی بھی شروع کر دی ہے کہ وہ زیادہ سے زیادہ تعداد میں رام لیلا میدان پہنچیں اور ’ووٹ چوری‘ کے خلاف مہم کا حصہ بنیں۔ کانگریس کے جواں سال اور تجربہ کار لیڈران سوشل میڈیا پلیٹ فارم پر پیغامات جاری کر اس مہم کو کامیاب بنانے کی کوشش کر رہے ہیں۔ ذیل میں پیش ہیں کچھ اہم لیڈران کی عوام سے کی گئی خصوصی اپیل، جو کہ کانگریس نے اپنے ’ایکس‘ ہینڈل پر جاری کی ہیں۔

جیتو پٹواری (صدر، مدھیہ پردیش کانگریس)

میں سبھی سے گزارش کر رہا ہوں کہ 14 دسمبر کو دہلی کے رام لیلا میدان پہنچنا ہے۔ نریندر مودی اور الیکشن کمیشن مل کر ملک بھر میں ’ووٹ چوری‘ کر رہے ہیں، اس سے جمہوریت، آئین، ووٹ کا حق خطرے میں ہے۔ ہم سبھی کو راہل گاندھی جی کے ساتھ مل کر ’ووٹ چوری‘ کے خلاف آواز بلند کرنی ہے۔

راؤ نریندر (صدر، ہریانہ کانگریس)

دہلی کے رام لیلا میدان میں 14 دسمبر کو راہل گاندھی جی کی قیادت میں ایک بڑی ریلی کا انعقاد کیا جا رہا ہے۔ ہریانہ کے انتخاب میں ووٹوں کی چوری کی گئی، جمہوریت کا قتل کرنے کی کوشش کی گئی۔ اس لیے میں ہریانہ کے باشندوں سے گزارش کرتا ہوں کہ آپ سبھی 14 دسمبر کو رام لیلا میدان میں آ کر اس ریلی کو کامیاب بنائیں۔

اودے بھانو (صدر، انڈین یوتھ کانگریس)

14 دسمبر کو دہلی کے رام لیلا میدان میں ’ووٹ چوری‘ کے خلاف ایک عظیم الشان ریلی ہونے جا رہی ہے۔ نریندر مودی اور الیکشن کمیشن مل کر جمہوریت کو ختم کرنے کی کوشش کر رہے ہیں، ووٹ چوری کر حکومت بنا رہے ہیں۔ ایسے میں پوری کانگریس پارٹی ان کی ’ووٹ چوری‘ کے خلاف آواز بلند کرنے کو تیار ہے۔ ہم ہر گھر، ہر بوتھ تک جائیں گے اور کسی بھی قیمت پر ’ووٹ چوری‘ روک کر رہیں گے۔

ڈاکٹر انل جئے ہند (چیئرمین، کانگریس او بی سی ڈپارٹمنٹ)

راہل گاندھی جی نے ’ووٹ چوری‘ کی حقیقت کو پوری دنیا کے سامنے ظاہر کر دیا ہے۔ اب وہ دہلی کے رام لیلا میدان میں ایک تاریخی ریلی کرنے جا رہے ہیں۔ انتخابات غیر جانبدار اور شفاف ہوں، اس لیے آپ سبھی کا رام لیلا میدان میں آنا بہت ضروری ہے۔

ورون چودھری (صدر، این ایس یو آئی)

14 دسمبر کو دہلی کے رام لیلا میدان میں تاریخی ریلی ہو رہی ہے۔ یہ ’ووٹ چوری‘ کے خلاف بڑا آغاز ہے۔ راہل گاندھی جی ’ووٹ چوری‘ کے خلاف لگاتار آواز بلند کر رہے ہیں۔ نوجوانوں اور طلبا کی آواز کو دبانے کے لیے بی جے پی ’ووٹ چوری‘ کر رہی ہے۔