وائرل سبزی فروش رامیشور سے راہل گاندھی نے کی ملاقات، ایک دن قبل مانگی گئی مراد ہوئی پوری

ملک میں بڑھتی مہنگائی کے درمیان گزشتہ روز دہلی کے آزاد پور منڈی سے ایک سبزی فروش کی ویڈیو وائرل ہوئی تھی۔ اس ویڈیو میں اپنا درد بیان کرتے ہوئے سبزی فروش کی آنکھیں نم ہو جاتی ہیں اور گلا بھی رُندھ جاتا ہے۔ اس سبزی فروش کی مزید ایک ویڈیو کل یعنی اتوار کے روز وائرل ہوئی جس میں وہ کانگریس لیڈر راہل گاندھی سے بات کرنے کی خواہش ظاہر کرتے ہوئے دکھائی دیا۔ اب ایک دن بعد ہی حقیقی معنوں میں اس سبزی والے کی ملاقات راہل گاندھی سے ہو گئی۔

اس سبزی فروش کا نام رامیشور ہے۔ وہ اتر پردیش کے کاسگنج ضلع کے کھتولی گاؤں کا باشندہ ہے اور دہلی میں سبزی فروخت کرنے کا کام کرتا ہے۔ ایک دن پہلے ایک چینل سے بات کرتے ہوئے رامیشور نے کانگریس لیڈر راہل گاندھی سے بات کرنے کی خواہش ظاہر کی تھی۔ ایک دن بعد آج اس کی راہل گاندھی سے کافی دیر تک نہ صرف ملاقات ہوئی، بلکہ ان کے ساتھ کھانے کا بھی موقع میسر ہوا۔

راہل گاندھی نے سبزی فروش رامیشور سے بہت دیر تک بات چیت کی۔ اس ملاقات کے بعد راہل گاندھی نے رامیشور کے ساتھ اپنی تصویر بھی ٹوئٹر پر شیئر کی ہے۔ انھوں نے اس کے ساتھ لکھا "رامیشور جی ایک زندہ دل انسان ہیں۔ ان میں کروڑوں ہندوستانیوں کی جھلک دکھائی دیتی ہے۔ مشکل حالات میں بھی مسکراتے ہوئے مضبوطی سے آگے بڑھنے والے ہی صحیح معنوں میں 'بھارت بھاگیہ وِدھاتا' ہیں۔"

واضح رہے کہ رامیشور کی پچھلی ویڈیو کو خود راہل گاندھی نے بھی شیئر کی تھی۔ اتنا ہی نہیں، ویڈیو وائرل ہونے کے بعد راہل گاندھی یکم اگست کو آزاد پور منڈی بھی پہنچے تھے اور وہاں سبزی اور پھل فروشوں سے ملاقات کی تھی۔ رامیشور نے بتایا کہ انھیں پتہ چلا کہ ان کی ویڈیو وائرل ہونے کے بعد راہل گاندھی آزاد پور منڈی پہنچے تھے۔ حالانکہ ان کی ان سے ملاقات نہیں ہو پائی۔ اسی بات چیت کے دوران انھوں نے راہل گاندھی سے بات کرنے کی خواہش ظاہر کی اور ایک دن بعد کانگریس لیڈر سے ان کی ملاقات ہو گئی۔