اعظم خان کے خلاف زمین پر قبضہ کا ایک اور مقدمہ درج

رامپور: سماج وادی پارٹی لیڈر و رکن پارلیمان اعظم خان اور دیگر کے خلاف زمین ہڑپنے کے ایک نئے معاملے میں ایف آئی آر درج کی گئی ہے۔

زمین ہڑپنے کے معاملے میں اعظم خان، سرکل افسر آل حسن، فصاحت سانو اور ویریندر گوئل کے خلاف نانہے نامی شخص نے رامپور پبلک اسکول بنائے جانے کے لئے زمین ہڑپنے کی ایف آئی آر درج کرائی ہے۔ رامپور ضلع انتظامیہ نے پہلے سے ہی سماج وادی لیڈر کے خلاف زمین ہڑپنے، مبینہ لوٹ، جعل سازی اور مجرمانہ معاملوں میں تقریباً 30 مقدمے درج کر رکھے ہیں۔

نانہے نے اپنی عرضی میں الزام لگایا ہے کہ پہلے اس کی اصل زمین کے بدلے میں زمین دی گئی تھی لیکن بعد میں اسے بھی لے لیا گیا۔ رامپور ایس پی اجے پال شرما نے رپورٹروں کو جمعرات کو یہاں بتایا کہ نانہے اور کچھ دیگر افراد نے شکایت کی ہے کہ ان کی زمین پر قبضہ کرلیا گیا تھا اور ان کے گھر منہدم کر دیئے گئے تھے۔ اس کے بعد انہوں نے بدلے میں دوسری زمین دینے کا وعدہ کیا تھا۔

انہوں نے کہا کہ الزام ہے کہ مکان منہدم کرنے کی کارروائی کے دوران اس کی گھر کی اشیاء، زیورات اور دیگر جانور لوٹ لئے گئے تھے۔ انہوں نے کہا کہ شکایت میں لگائے گئے الزامات جانچ میں صحیح پائے گئے ہیں۔ مزید جانچ جاری ہے اور اسی کی بنیاد پر آگے کی کارروائی کی جائے گی۔