زیر تربیت آئی اے ایس پوجا کھیڈکر کے خلاف یو پی ایس سی نے اٹھایا سخت قدم، ایف آئی آر درج

زیر تربیت آئی اے ایس پوجا کھیڈکر کے لیے دن بہ دن مشکلات بڑھتے جا رہے ہیں۔ کئی محاذ پر تنازعات کا سامنا کر رہیں پوجا کھیڈکر کے خلاف اب یو پی ایس سی نے سخت قدم اٹھاتے ہوئے ایف آئی آر درج کرائی ہے۔ ان پر الزام عائد کیا گیا ہے کہ امتحان میں زیادہ مواقع حاصل کرنے کے لیے انھوں نے فرضی دستاویزات کا استعمال کیا۔

یو پی ایس سی نے پوجا کھیڈکر کو وجہ بتاؤ نوٹس بھی جاری کیا ہے جس میں سوال پوچھا گیا ہے کہ مستقبل میں امتحانات دینے اور ان کے سلیکشن پر روک کیوں نہ لگائی جائے؟ علاوہ ازیں سول سروس امتحان 2022 کے لیے پوجا کی امیدواری منسوخ کرنے اور مستقبل کے امتحانات میں شامل ہونے سے روکنے کے لیے بھی وجہ بتاؤنوٹس جاری کیا گیا ہے۔

یو پی ایس سی (یونین پبلک سروس کمیشن) نے پوجا کھیڈکر سے متعلق ایک بیان جاری کیا ہے جس میں کہا ہے کہ کمیشن نے پوجا منورما دلیپ کھیڈکر کے معاملے میں گہرائی سے جانچ کی ہے۔ اس جانچ میں پتہ چلا ہے کہ انھوں نے اپنا نام، اپنے والدین کا نام، اپنی تصویر، دستخط، ای میل آئی ڈی، موبائل نمبر اور پتہ بدل کر شناخت چھپائی۔ اسی بیان میں کمیشن نے یہ بھی کہا ہے کہ پوجا کھیڈکر نے امتحان سے متعلق اصولوں کے تحت مقررہ حد سے زیادہ کوششوں کا فائدہ اٹھایا۔ کمیشن نے پوجا کے خلاف پولیس میں ایف آئی آر درج کرانے کے ساتھ ہی مجرمانہ مقدمہ چلانے سمیت دیگر کئی طرح کی کارروائی بھی شروع کر دی ہے۔