دیوالی سے عین قبل ایٹہ میں پٹاخوں کے گودام میں زوردار دھماکہ، 4 دکانیں منہدم، ایک ہلاک، کئی کے ملبے میں دبنے کا خدشہ

اترپردیش کے ضلع ایٹہ میں دیوالی سے عین قبل ایک خوفناک حادثہ پیش آیا، جس نے علاقے میں سنسنی پھیلا دی۔ اتوار کی شام باغ والا علاقے میں واقع ایک پٹاخوں کے گودام میں زوردار دھماکہ ہوا، جس کے نتیجے میں آس پاس کی چار دکانیں مکمل طور پر منہدم ہو گئیں۔ اس حادثے میں ایک شخص کی موت ہو گئی، جبکہ ایک دیگر شدید طور پر زخمی ہے۔ پولیس کے مطابق ملبے کے نیچے کئی افراد دبے ہونے کا خدشہ ہے اور راحت و بچاؤ کا عمل تیزی سے جاری ہے۔

پولیس نے بتایا کہ یہ دھماکہ باغ والا چوراہے سے تقریباً 100 میٹر کے فاصلے پر موجود پٹاخوں کے ایک گودام میں ہوا۔ زوردار دھماکے کی آواز کئی کلومیٹر دور تک سنی گئی۔ مقامی لوگوں نے فوری طور پر پولیس اور فائر بریگیڈ کو اطلاع دی۔ اطلاع ملتے ہی پولیس، فائر بریگیڈ اور مقامی انتظامیہ کی ٹیمیں موقع پر پہنچ گئیں اور ملبہ ہٹانے کا کام شروع کر دیا۔

اب تک ملبے سے ایک نامعلوم شخص کی لاش برآمد کی گئی ہے، جب کہ ایک شخص، جس کی شناخت سنجو لودھی کے طور پر ہوئی ہے، شدید زخمی حالت میں میڈیکل کالج میں داخل کرایا گیا ہے۔ ڈاکٹروں کے مطابق اس کی حالت تشویش ناک ہے۔

عینی شاہدین کے مطابق دھماکہ اتنا شدید تھا کہ چاروں دکانیں پلک جھپکتے میں زمین بوس ہو گئیں اور قریبی عمارتوں کی کھڑکیاں بھی ٹوٹ گئیں۔ پولیس افسران نے بتایا کہ ابتدائی طور پر یہ شبہ ظاہر کیا جا رہا ہے کہ دھماکہ گودام میں غیر محفوظ طریقے سے رکھے گئے بارود یا آتش گیر مادے کی وجہ سے ہوا۔ تاہم اصل وجہ جاننے کے لیے فورنسک ٹیم کو بھی بلایا گیا ہے۔

ایٹہ کے سرکل افسر (سی او) راجیش سنگھ نے بتایا کہ ملبے میں دبے ممکنہ افراد کی تلاش جاری ہے اور تمام ریسکیو اہلکار پوری مستعدی سے کام کر رہے ہیں۔ انہوں نے مزید کہا کہ حادثے کی مکمل جانچ شروع کر دی گئی ہے اور اگر غیر قانونی گودام کے الزامات درست پائے گئے تو متعلقہ افراد کے خلاف سخت کارروائی کی جائے گی۔