یوپی انتخاب: ’بجنور میں کھل رہی دھوپ، بی جے پی کا موسم خراب‘، پی ایم مودی کا دورہ رَد ہونے پر جینت کا طنز

اتر پردیش اسمبلی انتخاب بی جے پی کے لیے چیلنج ثابت ہو رہے ہیں۔ پارٹی کے سبھی بڑے لیڈران پوری طاقت جھونک رہے ہیں۔ وزیر اعظم نریندر مودی بھی آج بجنور میں ایک انتخابی ریلی کرنے والے تھے لیکن ان کا دورہ رد ہو گیا۔ جس کے بعد انہوں نے ورچوئل خطاب کیا ہے۔ بتایا جا رہا ہے کہ خراب موسم کی وجہ سے ان کے دورے کو رد کیا گیا ہے۔ خبروں کے مطابق صبح 10.30 بجے پی ایم مودی کو ہیلی کاپٹر سے دہلی سے بجنور پہنچنا تھا، لیکن مغربی یوپی میں کہرا چھائے رہنے کی وجہ سے 11.30 بجے تک کلیئرنس نہیں ملی اس کے بعد دورے کو رد کرتے ہوئے ورچوئل خطاب کا فیصلہ لیا گیا۔

پی ایم مودی کے دورہ رد ہونے پر آر ایل ڈی سربراہ چودھری جینت سنگھ نے طنز کے تیر چلائے ہیں۔ انھوں نے اپنے ٹوئٹر پر پوسٹ کیا کہ بجنور میں دھوپ کھل رہی ہے لیکن بی جے پی کا موسم خراب ہے۔ اس کے ساتھ ہی انھوں نے اپنے ٹوئٹ میں موسم سے متعلق جانکاری بھی شیئر کی۔

واضح رہے کہ یوپی اسمبلی انتخاب کے اعلان کے بعد وزیر اعظم نریندر مودی کی بجنور میں پہلی ریلی ہونی تھی۔ حالانکہ وزیر اعلیٰ یوگی آدتیہ ناتھ پہلے ہی بجنور پہنچ چکے ہیں اور انھوں نے ریلی کو خطاب بھی کیا۔ اس دوران وزیر اعلیٰ یوگی نے گزشتہ حکومتوں پر خوب حملہ کیا۔ ساتھ ہی فسادات کا تذکرہ کرنا بھی وہ نہیں بھولے۔