متھرا: پولیس اہلکاروں کی پٹائی کے خلاف کانگریس کا احتجاج، آر ایس ایس کارکنان پر کارروائی کا مطالبہ

کانگریس کے لیڈر پردیپ ماتھر نے کہا کہ جس طرح سے آر ایس ایس اور بی جے پی کارکنان کی جانب سے پولیس اہلکاروں کی پٹائی کی گئی ہے، اس سے پولیس فورس کی حوصلہ شکنی ہوئی ہے۔

تصویر آئی اے این ایس
تصویر آئی اے این ایس
user

قومی آوازبیورو

متھرا: ورنداون میں آر ایس ایس اور بی جے پی کارکنان کی جانب سے مبینہ طور پر پولیس اہلکاروں کی پٹائی کا معاملہ طول پکڑ رہا ہے۔ ورنداون میں گزشتہ روز پیش آنے والے اس واقعہ کے سلسلہ میں ملزمان کے خلاف ایف آئی آر درج نہ کیے جانے پر کانگریس کی متھرا یونٹ نے احتجاج کیا ہے اور کارروائی نہ ہونے پر تحریک چھیڑنے کی دھمکی دی ہے۔

کانگریس کے لیڈر پردیپ ماتھر نے کہا کہ جس طرح سے آر ایس ایس اور بی جے پی کارکنان کی جانب سے پولیس اہلکاروں کی پٹائی کی گئی ہے، اس سے پولیس فورس کی حوصلہ شکنی ہوئی ہے۔ مرتکبین کے خلاف کارروائی کے بجائے پولیس اہلکاروں کو معطل کر دیا گیا اور ان پر اقدامِ قتل کا مقدمہ درج کر دیا گیا۔


انہوں نے الزام عائد کیا کہ یہ دوسرا ایسا واقعہ ہے جب آر ایس ایس اور بی جے پی کے کارکنان نے قانون کو اپنے ہاتھ میں لیا۔ ماتھر نے کہا کہ سب کچھ ریکارڈ ہے اور واقعہ کی کئی ویڈیوز سوشل میڈیا پر وائرل ہو رہی ہیں۔

انہوں نے کہا کہ ان لوگوں کے خلاف آئی پی سی کی دیگر دفعات کے علاوہ قومی سلامتی قانون (این ایس اے) کے تحت مقدمہ درج ہونا چاہیے۔ اگر قصورواروں پر مقدمہ درج نہیں ہوتا تو ہم جلد ہی تحریک شروع کریں گے، تصاویر اور ویڈیو کلپ کے ذریعے ان کی شناخت کی جا سکتی ہے۔


خیال رہے کہ کچھ روز قبل آر ایس ایس کے ضلع پرچارک منوج کمار ورنداون دیگر ساتھیوں کے ساتھ کمبھ میلہ کے دوران جمنا ندی میں نہا رہے تھے، تبھی ان کا کسی بات پر پولیس کے ساتھ تنازعہ ہو گیا۔ اس واقعہ کے فوراً بعد ایک ویڈیو سوشل میڈیا پر وائرل ہو گئی، جس میں مبینہ طور پر 2-3 پولیس اہلکاروں کا کچھ نوجوان کے ساتھ تنازعہ ہوتا ہوا نظر آ رہا ہے۔ جس میں ایک نوجوان ایک پولیس اہلکار پر پیچھے سے ہیلمٹ مارتے ہوئے نظر آ رہا ہے۔ اس کے بعد پولیس اہلکاروں پر بدسلوکی کا الزام عائد کرتے ہوئے بی جے پی کے مقامی کارکنان دھرنے پر بیٹھ گئے۔ انہوں نے اعلیٰ انتظامی افسران اور پولیس افسران سے اس معاملہ میں مداخلت کا مطالبہ کیا۔

آر ایس ایس پرچارک منوج کمار کے ایک معاون نے سب انسپکٹر سمیت چار پولیس اہلکاروں کے خلاف معاملہ درج کروایا۔ وہیں وشو ہندو پریشد (وی ایچ پی) کے کارکن بچو سنگھ نے بھی قصوروار پولیس اہلکاروں کے خلاف قانونی کارروائی کا مطالبہ کیا۔ رپورٹ کے مطابق پولیس اہلکاروں کی رپورٹ درج نہیں کی گئی، تاہم انہیں معطل ضرور کر دیا گیا۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔