شادی شدہ خاتون کے قتل کے الزام میں پولس سب انسپکٹر اور خاتون کا شوہر گرفتار

اتر پردیش میں ضلع ہمیر پور کے موداہا علاقے میں پولس نے جمعرات کے روز سڑک کے کنارے جھاڑیوں میں برہنہ حالت میں برآمد ہونے والی خاتون کی لاش کی شناخت سی آر پی ایف کے ایک جوان کی بیوی کے طور پر کی ہے۔

خاتون کی طرف سے اپنے شوہر کے خلاف گھریلو تشدد کا مقدمہ چل رہا تھا۔ یہ تفتیش مہوبہ تھانہ میں تعینات ایک سب انسپکٹر کے ذریعہ کی جا رہی تھی، جس کے ساتھ اس کا پیار تھا۔ اس کے بعد سب انسپکٹر سے اس کا اختلاف ہو گیا۔ سب انسپکٹر نے اس کے شوہر کے ساتھ مل کر خاتون کو اس وقت اغواء کیا جب وہ مقدمہ کی سماعت کی تاریخ پر گئی تھی، اسے اغواء کرکے قتل کیا گیا اور اس کی لاش کو موداہا کے علاقے میں سڑک کے کنارے جھاڑیوں میں پھینک دیا۔

پولیس نے ملزم سب انسپکٹر اور خاتون کے شوہر کو حراست میں لے کر ان سے پوچھ گچھ شروع کر دی ہے۔پولس کے مطابق جمعرات کی صبح موداہا تھانہ علاقہ کے بسواری روڈ پر رمنا کشن پور گاؤں کے قریب جھاڑیوں سے خاتون کی لاش برہنہ حالت میں ملی۔ اس کے چہرے کو آوارہ کتوں نے مسخ کر دیا تھا۔ پولس کو جہاں لاش پڑی تھی وہاں سے کچھ فاصلے پر سڑک پر خون کے دھبے بھی ملے۔