ہندوستان کے پانچ امیر ترین مسلمان خاندان

ہندوستان میں بہت سے مسلمان خاندان اپنی محنت، کاروباری ذہانت کی بنیاد پر مالی طور پر بہت کامیاب ہیں۔ ان خاندانوں نے نہ صرف ہندوستان بلکہ عالمی سطح پر بھی اپنی پہچان بنائی ہے۔ انہوں نے معاشی دنیا میں بہت نام روشن کیا ہے اور ہندوستان کاسر فخر سے اونچا کیا ہے۔

اس میں سب سے سر فہرست عظیم پریم جی کا نا م آتا ہے۔عظیم پریم جی، ہندوستان کے کامیاب مسلمان تاجروں میں سے ایک ہیں اور اپنی دولت اور ہمت کے لیے جانے جاتے ہیں۔ عظیم پریم جی وپرو لمیٹڈ کے بانی اور چیئرمین ہیں۔ وپرو ایک سرکردہ آئی ٹی کمپنی ہے، عظیم پریم جی اپنی انسان دوستی کے لیے بھی مشہور ہیں۔ انہوں نے اپنی دولت کا بڑا حصہ سماجی کاموں بالخصوص تعلیم کے لیے عطیہ کیا ہے۔ فوربس کے مطابق ان کی کل دولت 12.2 بلین امریکی ڈالر یعنی 1 لاکھ کروڑ روپے تک ہے اور فلانتھراپی لسٹ 2021 کے مطابق انہوں نے 9713 کروڑ روپے کا عطیہ دیا ہے۔ اگر روزانہ کی بنیاد پر شمار کیا جائے تو انہوں نے روزانہ 27 کروڑ روپے عطیہ کیے ہیں۔

ایم اے یوسف علی لولو گروپ انٹرنیشنل کے منیجنگ ڈائریکٹر ہیں۔ کیرالہ کے رہنے والے یوسف علی نے ابوظہبی میں اپنی کمپنی شروع کی۔ جو اب مشرق وسطیٰ، ہندوستان اور دیگر ممالک میں ہائپر مارکیٹس اور شاپنگ مالز کا ایک بڑا نیٹ ورک ہے۔ فوربس کے مطابق، 'مڈل ایسٹ ریٹیل کنگ' کے نام سے مشہور یوسف علی کی کل مالیت 7.4 بلین ڈالر (تقریباً 65,150 کروڑ روپے) ہے۔ بھارت میں، انہوں  نے کیرالہ میں بڑے شاپنگ مال بنائے ہیں، جو روزگار اور کاروبار کے مواقع فراہم کرتے ہیں۔

یوسف حمید دوا ساز کمپنی سپلا کے مالک ہیں، جو ہندوستان کی معروف دوا ساز کمپنیوں میں سے ایک ہے۔ یوسف حمید ایک مشہور سائنسدان اور صنعت کار ہیں جنہوں نے سستی ادویات کی تیاری میں اپنا حصہ ڈالا ہے، خاص طور پر HIV/AIDS کے علاج کے لیے۔ ان کی مجموعی مالیت کا تخمینہ تقریباً 2.6 بلین ڈالر (تقریباً 21,000 کروڑ روپے) ہے۔ سپلا کا صدر دفتر ممبئی میں ہے، اور یہ کمپنی پوری دنیا میں اپنی ادویات کے لیے مشہور ہے۔ یوسف حمید کو 2005 میں حکومت ہند نے پدم بھوشن سے نوازا تھا۔

رفیق ملک ہندوستان کے ایک معروف تاجر اور میٹرو برانڈز لمیٹڈ کے چیئرمین ہیں۔ ان کی کمپنی میٹرو شوز ہندوستان میں جوتے کی ایک سرکردہ ریٹیل چین ہے، جو میٹرو، موچی، واک وے، ڈاونچی اور فٹ فلاپ جیسے برانڈز کے لیے مشہور ہے۔ فوربس کے مطابق رفیق ملک کی مجموعی مالیت 2.1 بلین ڈالر (تقریباً 17,160 کروڑ روپے) ہے۔ 2023 میں، وہ فوربس کی ارب پتیوں کی فہرست میں 1,434 ویں نمبر پر تھے اور 2022 میں ہندوستان کے 89 ویں امیر ترین شخص کے طور پر درج تھے۔

ڈاکٹر آزاد موپن دبئی میں رہنے والے ہندوستانی نژاد کاروباری اور طبیب ہیں۔ 1953 میں کلپاکنچیری، کیرالہ میں پیدا ہوئے، ڈاکٹر موپن نے کالی کٹ میڈیکل کالج سے ایم بی بی ایس اور ایم ڈی مکمل کیا۔ انہوں نے اپنی تعلیم کے دوران گولڈ میڈل بھی حاصل کیا تھا۔ 1987 میں وہ ایک خاص کام کے لیے دبئی گئے اور یہاں سے ان کی زندگی نے ایک نیا موڑ لیا۔ فوربس کے مطابق، 2024 تک، ڈاکٹر آزاد موپن کی مجموعی مالیت تقریباً 1 بلین امریکی ڈالر ہے یعنی تقریباً 8300 سے 8400 کروڑ روپے۔ اس سے وہ متحدہ عرب امارات (یو اے ای) کے امیر ترین ہندوستانیوں میں سے ایک ہے۔  (انپٹ بشکریہ نیوز پورٹل ’اے بی پی‘)