پنجاب کے 3 علاقوں کو ملا ’مذہبی شہر‘ کا درجہ، گوشت، تمباکو، اور دیگر نشہ آور اشیاء پر ریاستی حکومت عائد کرے گی پابندی

پنجاب حکومت نے ریاست کے 3 اہم شہروں کے حوالے سے بڑا فیصلہ کیا ہے۔ حکومت نےایک سرکاری نوٹیفکیشن جاری کر امرتسر کے چار دیواری علاقہ (والڈ سٹی)، شری آنند پور صاحب نگراور تلونڈی سابو نگر کو ریاست کے مقدس شہر قرار دیا ہے۔ اس فیصلے کے بعد ان علاقوں میں شراب، تمباکو اور گوشت جیسی مصنوعات کی فروخت اور استعمال پر سخت پابندیاں عائد کرنے کے لیے اقدامات کیے جا رہے ہیں۔

پنجاب حکومت کے محکمہ داخلہ کے ایڈیشنل چیف سکریٹری آلوک شیکھر نے جاری نوٹیفکیشن میں بتایا کہ پنجاب کے گورنر کو یہ اعلان کرتے ہوئے خوشی ہورہی ہے کہ ضلع امرتسر کا چار دیواری علاقہ، ضلع روپ نگر کا شری آنند پور صاحب نگراور ضلع بھٹنڈہ کا تلونڈی سابو(شری دمدما صاحب) اب ریاست پنجاب کے مقدس شہر ہوں گے۔

اس فیصلے کے بعد حکومت نے محکمہ ایکسائز کو واضح ہدایات جاری کر دی ہیں۔ محکمہ ایکسائز کے انتظامی سیکرٹری کو ہدایت کی گئی ہے کہ وہ ان تینوں شہروں کی میونسپل حدود کے اندر تمام الکحل اور اس سے متعلقہ مصنوعات کی فروخت اور استعمال پر پابندی کے احکامات جاری کریں۔ امید کی جا رہی ہے کہ شراب کی دکانوں کو بند کرنے یا ان کی منتقلی سے متعلق نوٹیفکیشن جلد ہی جاری کیا جائے گا۔

اس فیصلے میں محکمہ صحت اور خاندانی بہبود کو بھی اہم ذمہ داری دی گئی ہے۔ محکمہ سے درخواست کی گئی ہے کہ ان مقدس شہروں میں سگریٹ، تمباکو اور دیگر نشہ آور اشیاء کی فروخت اور استعمال پر پابندی کے احکامات جاری کئے جائیں۔ حکومت کا خیال ہے کہ اس سے مذہبی ماحول کو مزید مقدس بنانے میں مدد ملے گی۔

محکمہ مویشی پروری کوبھی ہدایت دی گئی ہے کہ امرتسر کے چار دیواری علاقہ، شری آنند پور صاحب اور تلونڈی سابو کی میونسپل حدود میں گوشت اور اس سے متعلقہ مصنوعات کی فروخت اور استعمال پر پابندی کے احکامات جاری کئے جائیں۔ اس اقدام کو مذہبی جذبات کے احترام کے طور پر دیکھا جا رہا ہے۔

اس سلسلے میں اطلاع اور ضروری کارروائی کے لیے مقامی انتظامی محکمہ کو نوٹیفکیشن بھیج دیا گیا ہے۔ اس کے علاوہ امرتسر، روپ نگر اور بھٹنڈہ کے ڈپٹی کمشنروں کو بھی اس فیصلے سے آگاہ کر دیا گیا ہے اور ضروری اقدامات کرنے کی ہدایت دی گئی ہے۔ توقع ہے کہ آنے والے دنوں میں مقامی انتظامیہ اس فیصلے کو زمینی سطح پر نافذ کرنے کے لیے رہنما خطوط جاری کرے گی۔

حکومت کے اس فیصلے کو ان تینوں شہروں کی مذہبی اہمیت کے اعتبار سے دیکھا جا رہا ہے۔ امرتسر سکھ مذہب کا سب سے بڑا مذہبی مرکز ہے، جبکہ شری آنند پور صاحب اور تلونڈی سابو (سری دمدما صاحب) بھی سکھ تاریخ اورعقیدے سے جڑے ہوئے ہیں۔ حکومت کا کہنا ہے کہ یہ فیصلہ ان شہروں کے تقدس اور مذہبی وقار کو برقرار رکھنے کے لیے ضروری تھا۔