’یہ عدالت میں آنے والوں کے بنیادی حقوق کی خلاف ورزی‘، عدالتی احاطوں میں بیت الخلاء کی بدتر حالت پر سپریم کورٹ چراغ پا

پورے ملک کے عدالتی احاطوں میں موجود بیت الخلاء کی گندگی اور غیر صحت مند حالت عدالتی صارفین کے بنیادی حقوق اور وقار کی خلاف ورزی کر رہی ہیں۔ یہ جانکاری ملک کے دیگر ہائی کورٹ کی جانب سے سپریم کورٹ میں پیش کی گئی اسٹیٹس رپورٹ میں دی گئی ہے۔ رپورٹ میں سپریم کورٹ کو بتایا گیا کہ میٹرو شہروں کے ہائی کورٹس میں بھی بیت الخلاء کی حالت ٹھیک نہیں ہے، بلکہ یہ انتظامی اور مالیاتی ناکامی کی واضح مثال ہے۔ اس میں پیسے کا صحیح استعمال نہ ہونا، دیکھ بھال کے معاہدوں کا نفاذ نہ ہونا اور جوابدہی کی کمی شامل ہے۔

رپورٹ کے مطابق موجودہ بیت الخلاء اور بنیادی ڈھانچہ جدید اور جامع عوامی سہولیات کے معیار پر کھڑے نہیں اترتے۔ یہ عوامی صحت اور صفائی میں ناکامی کی جانب واضح اشارہ ہے۔ جیسے کئی ہائی کورٹ اور ضلعی عدالتوں میں معذوروں کے لیے ریمپ، سہارا دینے والی بار اور وہیل چیئر کے لیے جگہ کی کافی کمی ہے۔ اسی طرح تیسرے صنف (ٹرانسجنڈر) کے لیے الگ یا جنڈر نیوٹرل بیت الخلاء کی کمی ہے۔ خواتین وکلاء اور ملازمین کے لیے کریچ یا بچوں کی دیکھ بھال کی سہولیات کی کمی ان کے پیشہ ورانہ اختیارت میں رکاوٹ ڈالتی ہے۔ ساتھ ہی ذیلی آپریشنل جوڈیشری میں حالت سب سے سنگین ہے، اس کے لیے ضروری ہے کہ مقامی سطح پر بہتر سہولیات ہوں، جس میں مقامی ضرورتوں کا اندازہ لگانا، بجٹ مختص کرنا اور کمیونٹی کی سطح پر نگرانی شامل ہو۔

سپریم کورٹ کو بتایا گیا کہ ان سہولیات کی خراب حالت دیہی علاقوں میں ججوں اور ملازمین کے کام کرنے کی صورتحال، صحت اور کارکردگی پر منفی اثر ڈالتا ہے، ساتھ ہی عدالت کے وقار کو بھی نقصان پہنچاتا ہے۔ یہ رپورٹ وکیل راجیب کلیتا کی طرف سے دائر پی آئی ایل (مفاد عامہ کی عرضی) کے تحت پیش کی گئی تھی۔

واضح رہے کہ رواں سال 15 جنوری کو سپریم کورٹ نے حکم دیا تھا کہ عوامی بیت الخلاء دستیاب کرانا ریاستی حکومت اور مرکز کے زیر انتظام علاقوں کی ذمہ داری ہے۔ تمام ہائی کورٹ، ریاستی حکومتوں اور مرکز کے زیر انتظام علاقوں کو مرد، خواتین، معذور اور ٹرانسجنڈر افراد کے لیے الگ الگ بیت الخلاء دستیاب کرانے کے حکم دیے گئے ہیں۔ اس رپورٹ کی بنیاد پر سپریم کورٹ نے عدالتوں کے احاطوں میں ہر طرح کے صارفین کے لیے صاف ستھرے اور سہولت آمیز بیت الخلاء کی ضروریات پر زور دیا ہے۔