مدھیہ پردیش میں حفاظت کے ذمہ دار محکمہ جنگلات کے دفتر سے ہی صندل کا درخت کاٹ لے گئے چور

مدھیہ پردیش کی راجدھانی بھوپال میں ایک چونکانے والا واقعہ سامنے آیا ہے جس نے محکمہ جنگلات کی کارکردگی پرہی سوال کھڑے کردیئے ہیں۔ یہاں جس محکمہ جنگلات پر جنگل اوردرختوں کی حفاظت کی ذمہ داری ہے، اسی محکمہ کے دفتر سے صندل کا درخت کاٹ کر چور فرار ہوگئے۔ اس سنسنی خیز واردات کے بعد محکمہ کی سنجیدگی پر انگلیاں اٹھنے لگی ہیں۔

 یہ واقعہ بھوپال کے 74 بنگلہ علاقے میں پیش آیا، جہاں چیف کنزرویٹر آف فاریسٹ (سی سی ایف) کا دفتر واقع ہے۔ رات گئے نامعلوم چوروں نے صندل کے تین درخت آری سے کاٹ ڈالے۔ اتنا ہی نہیں چور ایک درخت ساتھ لے کر فرار ہونے میں بھی کامیاب رہے جبکہ باقی دو درختوں کو کاٹ کر وہیں چھوڑ دیا۔ محکمہ نے پولیس میں واقعہ کی شکایت درج کرائی ہے۔

محکمہ جنگلات کا دفتر شہر کے سب سے پوش اور محفوظ مانے جانے والے علاقوں میں واقع ہے۔ یہاں کئی وزراء، سابق وزراء، قائد حزب اختلاف، سینئر آئی اے ایس اور آئی پی ایس افسران کے بنگلے موجود ہیں۔ جس جگہ چوری ہوئی ہے اس کے بلکل قریب ہی وزیر حیوانات لکھن پٹیل کی رہائش گاہ بھی جہاں 24 گھنٹے سیکورٹی گارڈ تعینات رہتے ہیں۔

اتنے ہائی پروفائل اور محفوظ مانے جانے والے علاقے میں صندل کا درخت کاٹ کرلے جانا پولیس اور سیکورٹی بندوبست پر سنگین سوال کھڑے کرتا ہے۔ ابھی یہ بھی واضح نہیں ہے کہ چور کس راستے سے آئے اور کس طرح درخت کاٹ کر بغیر کسی کی نظر میں آئے آسانی سے فرار ہوگئے۔ پولیس معاملے کی جانچ کر رہی ہے اور آس پاس کے سی سی ٹی وی فوٹیج کی بھی جانچ کی جا رہی ہے۔